無綫新劇《奔跑吧！勇敢的女人們》飾演丁仲堯丁丁（蕭正楠飾）經理人禾平的朱敏瀚，昨晚（3日）播出一集有驚喜演出。劇情講述林采琳（吳若希飾）與沈洛澄（賴慰玲飾）為了復刻版蒸餾水廣告女主角位置爭崩頭，事件擾攘至蒸餾水老闆娘邱梁嫦可（林漪娸飾），邱太最終將女主角決定權交給禾平！變成夾心人的禾平接到Order後第一時間竟是衝出會議室、然後喪灌一大支蒸餾水舒緩緊張情緒，期間更飲到衣衫盡濕。由於禾平踏實得嚟有智慧兼有轉數，加上朱仔本身的冷帥顏值。令角色成功吸獲網民關注及正評：「佢適合演d比較cool嘅角色，可嘗試吓霸道總裁呢d角色」。
除了是「隱藏型暖男」，為了配合角色低調人設及劇集的喜劇設定，朱仔均努力地炮製「微表情」增強喜感，無論面對吳若希的瘋狂進逼，或是蕭正楠的滑稽處事方式，朱仔眉頭眼額間的受驚、失笑及等睇好戲的食花生樣等，均為場口生色不少，堪稱「微表情男神」。朱仔受訪時坦言今次確實是刻意選用了較細微的演繹方式：「呢個方式係喺《反黑路人甲》度學番嚟，當其他人High嘅時候，我就subtle啲，咁就會畀到觀眾冷面笑匠嘅感覺，同其他演員亦會有一凹一凸嘅平衡感喺番度。」朱仔又大賣關子謂，在稍後播出的劇情中，將有crossover《反黑路人甲》情節出現。談到飲水場口，朱仔笑言確實飲了很多水，並補充指場口拍了兩日，其中一日更是單純拍攝飲水鏡頭，足見製作認真。
至於飾演電視台導演楊子涵的尹詩沛亦為觀眾送上驚喜，為人直率的子涵，做起事上來雖然聲大大、感覺粗獷又豪邁，但私下不但有感性一面，打扮起上來更絕對是靚女。昨晚一集，詩沛身穿低胸貼身戰衣，與好姊妹吳若希Jinny齊齊夜蒲，與在電視台工作時的中性打扮極大反差，這次亦是詩沛繼《企業強人》後，再度於同一套劇集中展現反差感。
詩沛接受訪問時，笑言楊子涵是最貼近其真實性格的角色，並笑指阿蕭是整套劇NG的罪魁禍首：「阿蕭本身個人非常好笑，所以呢套嘢如果有人NG，都係阿蕭嘅錯，因為佢真係好好笑，經常搞到人焗蟹。」她又指與阿蕭會即場幫角色加小動作及碎嘴：「好多嘢都係我哋自己度，所以都覺得好得意。」雖然詩沛與Jinny和阿賴是首度合作，但三人卻默契十足，其中一場詩沛的醉酒戲份，不但詩沛的醉酒狀態勁像真，阿賴的「嫌棄」樣亦是相當到肉！對此，詩沛坦言阿賴是很好的拍檔：「佢每日都會不斷好真心咁講好多讚美我嘅說話，係咁增強我自信，真係好多謝佢。」又笑言開劇前有向Jinny「攞正牌抽水」，十分抵死：「我同佢講話我會係咁掂佢，佢話ok，所以劇入面一有機會，我就會係咁摸佢同捽佢大髀。」
