無綫聲演真人騷《好聲好戲2》來到第三輪，由李佳芯（Ali）、袁文傑、陸浩明（6號）及黃俊豪爭奪晉身決賽的最後一張入場券。在熱身環節表現出色的Ali，於首回合選擇聲演《執到寶》黃韻詩被兩隻鬼上身的場口，同樣一人分飾兩角，分別要聲演「唱大戲男鬼」及「重口音女鬼」，Ali輕鬆駕馭，配起女聲時更分外嬌俏，最終獲得11盞綠燈滿分佳績。龍天生大讚：「你第一粒音已經似黃韻詩，有嗰種味道。」連出名要求高的黃鳳英都大表認同，評判凌晞則說：「好鍾意你扮個老婆，個口音好正，同埋嗰啲『嗯（嬌嗲聲）』，好正！」
6號陸浩明挑戰聲演《溏心風暴》阮兆祥被逐出家門的場口，做慣司儀工作的6號咬字發音方面保持水準，惟配音時「戲味」欠奉，遭汪明荃（阿姐）狠評：「係進步咗好多，但做戲就唔同囉，尤其用把聲嚟做戲，你兩樣都未到，你都係做番主持好啲！」6號事後受訪時坦言心都裂埋：「鏡頭後阿姐都有教我如果要學配音或者演戲，真係要搵個人或者實物練會好啲囉，其實阿姐好窩心嘅。」熱身階段表現麻麻的黃俊豪於今回合再度失準，一眾評判睇到「鞋鞋聲」，阿姐狠批「有懶音又甩嘴」，大受打擊的黃俊豪一度哽咽直指「壓力大」。
第二回合「技巧聲演」，四位參賽者需聲演格鬥場口。6號、黃俊豪聲演《鹿鼎記》劉德華及梁朝偉打架場口，評判潘文柏說：「大家不相伯仲，兩個都有甩嘴同埋食唔到個戲位。」。Ali則孖住袁文傑上演《鐵拳英雄》「猴子偷桃」場口，袁文傑聲演「男人最痛」時表現出色，獲讚「真係做到嗰種痛」。綜合兩個回合成績，Ali奪得7票暫時領先排第一，黃俊豪則「捧蛋」包尾。
