無綫聲演真人騷《好聲好戲2》第二輪比賽，在首兩回合聲演《棟篤神探》「女長人」及《智能愛人》「阿寶」的吳幸美，被指蔡少芬及李佳芯上身，大獲全勝，但因在第三回合，幸美聲演《踩過界II》「癲姐」醉酒一夜戲稍遜，仍有10盞綠燈，但被眾評判指她的表現「差咁啲」。加上前兩回合捧蛋的樊亦敏，在聲演《花花世界花家姐》「痛苦求分手」的一幕戲大翻身，與片中的佘詩曼合二為一，獲得11盞綠燈滿分，並影響了最終賽果，在專業評判、導師和三位主席評判合共的5票中，幸美獲得主席評判之一的汪明荃和專業評判兩票，樊亦敏則獲導師和兩位主席評判的3票。
由於幸美前兩回合表現太好，最後未能出線，很多網民都戥她不值，在無綫官網留言：「都唔公平，睇嚟都冇意思」、「細個猜包剪揼三盤兩勝，明明贏咗兩盤，但卻判一盤贏嘅出線。咁鬥嚟把托？勝之不武！」、「吳幸美輸在冇名氣！三太咁都贏？造馬造到！」、「睇咁多集，呢次結果最失望及跌眼鏡，值得一讚吳幸美，入型入格，沒得輸」、「點樣做評判㗎？贏兩次反而輸？贏一次就贏？投訴無綫？重新選多次！」
