電影《失衡凶間之惡念之最》即將上映，電影海報今日（13日）曝光。盧慧敏（Amy）在戲中飾演姜皓文（黑仔）前妻，這對「黑白CP」戲內戲外充滿火花，戲中剛陽味濃的黑仔非常火爆，而且一言不合，連垃圾桶都一腳踢凹。但當他遇上美麗的Amy時，眼神立即變得充滿憐愛，就算Amy對他單單打打，野蠻發爛，他都默默承受。戲中，當黑仔帶Amy逃出密室期間，不斷碰釘，加上本身感情瓜葛，火藥味濃，Amy對黑仔失去信任，準備撇甩他丟頭走的時候，黑仔從後攬住Amy阻止，她掙扎甩開他後，乘機一腳踢中「男人最痛」，黑仔硬食倒地。
導演一聲「Cut」大讚非常好，Amy立即回頭向黑仔耍冧，黑仔示意無事，她才鬆口氣。不過黑仔好奇問Amy：「頭先係咪諗住真踢？」Amy立即否認。黑仔說：「真係武林高手，演得似。」Amy：「你避得好 ！」黑仔得戚笑說：「我真係食過吓夜粥架嘛！」
戲中不乏二人糾纏拉扯鏡頭，更是不打不相識，黑仔說：「我哋喺戲中關係都幾特別，有啲感情經歷。」為了快速增進感情，他們鏡頭後以「黐手」熱身，Amy說：「原來大家都係武林中人。」黑仔說：「識英雄重英雄。對其他女演員可能會盡量輕手，但Amy俾我感覺好硬淨，憐香惜玉之餘都可以俾佢自由發揮多啲。」
