家燕姐的兩歲半孫仔Julian以四國語言拜年。
家燕姐早前與馬來西亞國寶級天后茜拉（Shila）推出賀年歌《有有有The Year Of YO!》大受歡迎，網上的點擊率已超過120萬，連家燕姐年僅兩歲半的孫仔Julian亦齊齊跟住唱跳，「孫仔一定講恭賀說話，上年廣東話同英文，今年就加埋普通話同日文，因為我仔同新袍都有學日文，新抱話小朋友愈細開始學就愈吸收得到，之前去日本旅行都識聽人講，都幾有語言天分，新抱仲話俾佢學多幾國語言，我就話暫時四個語言夠喇！」
問到孫仔有沒有演藝細胞？家燕姐就話肯定有，「聖誕節表演已第一時間周身郁，仲去搶咪，可能佢見我唱，好得意，我新抱都話有我基因，好享受舞台，我有首歌有有有，佢都跟我一齊唱，我新抱俾佢聽之後，佢就唱俾我聽，所以就一齊唱，佢最拿手梗係唱《家燕媽媽》同《皆大歡喜》，佢一聽到『皆』就叫嫲嫲，佢已經知到首歌係我嘅。」初八於澳門舉行演唱會的家燕姐，農曆新年前一直忙於綵排，難得初一、二可以抖下，「今年工作到年三十晚，之後就有兩日可以同屋企人一齊過農曆年，每年初一好都會有多人嚟我屋企拜年，初二就大家會約出去食飯，之後一齊睇煙花。」
