《家族榮耀之繼承者》昨晚（16日）播出的第四集，丘智斌（羅子溢飾）被揭出是守義（羅嘉良飾）二房太太邵家碧（張鳳妮飾）的親生兒子，當年守義為爭奪家族話事權，才將剛出生的智斌與守義正室戴綺婷（余安安飾）誕下的芷嵐（梁靖琪飾）調包！
智斌意外得悉真相後大為震撼，今晚播出的第五集，智斌更會主動與家碧相認；對於相隔近30年終可聽到兒子叫自己「媽咪」，家碧眼眶馬上谷滿激動又感動的眼淚；之後二人在佛堂拜祖先時，家碧的情緒又由強忍悲痛哽咽訴說不堪回首的過去，但當見到兒子如此生性時，又再轉換為喜極而泣，鳳妮將兩種不同層次的「喊戲」拿捏得十分精準，獲已率先在網上收看第五集的網民讚嘆留言：「演技大爆發」。
張鳳妮透露，她是1996年年尾離開無綫，故是次是闊別熒幕長達28年後的「復出」演出，亦是她與撈家自《天地男兒》後相隔28年再合作，出山原因是總監製梁家樹親自邀請。1987年憑藉參選香港小姐進入娛樂圈的鳳妮，較令人深刻的劇集作品有《同居三人組》、《餐餐有宋家》、《天地男兒》及《苗翠花》等，近日不少網民還翻出鳳妮昔日靚相與今劇做對比，大讚現年57歲的鳳妮保養得宜、氣質特別，更大讚她演繹豪門少奶入型入格：「戲內戲外都演活了少奶風範。」
為做好「機心二房」，鳳妮受訪時，坦言事前做足功課，在正式鑽研角色前已看了三次劇本：「呢個角色好大挑戰，所以我先接拍。功夫我做得好足，但未做到最好。我初初睇劇本，頭兩次係當故仔咁睇，去了解（角色）頭段、中段同Ending嘅分別。之後再每個場口去mark應該點做，同埋我盡量唔想做到咁乞人憎，所以我對三個小朋友（梁靖琪、陳瀅、羅子溢）都一視同仁，希望令到角色睇落有少少可憐嘅感覺。呢個角色對我嚟講難度非常高，我都仲未能夠做到最好，希望觀眾睇咗之後俾啲意見我。」
鳳妮坦言起初入劇組狀態不太好，並感謝子溢帶她入戲：「我初初入組時，好多場都唔係好入到戲，好彩都唔係重頭戲，係我仔子溢係帶到我。最難忘嗰場，係我帶佢見我已過身嘅父母（第五集），嗰場戲主要都係我講對白，子溢冇乜對白，不過佢俾我嘅反應係開始眼紅、熱淚盈眶，然後捉住我隻手，呢啲俾到我好足嘅戲，我可以跟住佢嘅情緒做反應，到佢叫我阿媽時，我就有眼淚流到出嚟。呢場戲好似第四、第五日左右拍嘅，我拍完就好似開咗竅咁，個人安心咗，啲戲之後都做得放咗，因為我知道子溢可以帶到我戲。」
