鄧小巧今個月與外籍男友「白先生」結婚，現身處加拿大的她正與老公享受甜蜜的新婚生活。今日，小巧在IG貼出數張與白先生相視而笑的照片，不過她卻有感發，透露自己多次受到語言暴力，「關於語言暴力，從公布求婚到結婚，收到好多好好嘅祝福，但都收到一啲惡毒難聽嘅說話。其實喺呢行咁耐，都聽唔少。嚟嚟去去，以前對我嘅攻擊都係醜樣、肥、豬x，生成咁樣學咩人做歌手之類。結婚之後就話『鬼佬真係重口味』、『多個人去外國做雞』、『呢啲豬扒真係鬼佬先食得落」諸如此類。』
小巧直言各式各樣的語言暴力就係因為大家「唔理」，所以一直以來某一小撮人就橫言無忌，「網上嘅語言暴力好可怕，因為留言嘅人見到你，但你可能永遠見唔到留言嘅人。我哋好經常批評別人嘅外表，肥嘅太肥，瘦嘅太瘦，靚嘅整容，性感嘅就係蕩婦。總之就要搵到你睇唔順眼嘅地方，然後暗中背後指住人哋謾罵，好似呢個世界上仲欠缺好多惡毒嘅人。莫因惡小而為之，莫因善小而不為。」她又表示：「我哋就係包庇一啲小惡行，慢慢縱容出大惡行。而同時，我相信可能曾經惡毒嘅你，都曾經受過傷害、被無理指責，或者同樣被語言/身體暴力過。但將恨傳播，唔會為自己同世界帶嚟任何好處。」
小巧最後指：「得到愛，唔一定要生得靚。呢個係我哋嘅first dance，我話我想著便服，佢話：whatever makes u feel good，be nice to the world。」
圖片來源：鄧小巧@Instagram