本月6日是鄭希怡Yumiko的43歲生日，生日當天在社交平台發布新歌《Lady King》，這次是她相隔十年再出新歌，Yumiko更親自參與填詞；疫情期間與老公梁學儲和9歲女兒「梁浸浸」舉家移居上海，最近一家三口正式回流返港，Yumiko大讚女兒適應能力強，思想亦十分獨立。
相隔十年再出新歌，Yumiko再次走訪香港的電台宣傳，她接受本刊訪問說︰「我哋最近一家人搬返香港住，阿浸都轉返喺香港讀書，因為好耐冇出新歌，依家做宣傳又去返電台，見到好多老朋友，我覺得呢個感覺好正，發現原來好多人都十年冇見，但依然咁親切。」
新歌《Lady King》以自己的原名鄭列瓊作靈感，「因為我細個喺慈雲山讀書，所以有個花名叫『慈雲山瓊姐』，King就係『瓊姐』，首歌係講自己的成長，歌詞講我細個時，因為爹哋媽咪都唔喺香港，雖然覺得呢個地方有啲陌生，但覺得唔可以辜負佢哋，反而更加要去努力去做好啲。當時就諗，都好耐冇出新歌，不如做啲好玩啲嘅嘢，試吓玩rap啦，用咗幾種語言，廣東話、上海話和國語，其實呢幾種語言都係我嘅母語，一次過擺晒喺首歌入面。」
《Lady King》MV
疫情期間，Yumiko與老公梁學儲Andy和女兒一起移居上海，Yumiko更因為參與綜藝節目《乘風破浪的姐姐》打開了內地市場，繼而拍攝多個電視節目和網絡電影，今年梁浸浸已經9歲，Yumiko亦決定女兒返到香港上學，「我哋喺上海住咗三年，因為疫情期間咁啱參與咗《乘風破浪的姐姐》，之後一連串接下一堆工作和拍戲，當時返香港又要隔離，父母又一直住喺上海，佢哋就話不如留喺上海，我同老公傾咗之後，佢就帶埋阿女過去，一家人一定要一齊。」
問到女兒返港讀書是否要重新適應？Yumiko說：「佢喺上海讀書可以揀繁體定簡體字，我幫佢揀繁體字，所以返香港讀書都唔使咁辛苦。」雖然工作有增無減，但Yumiko坦言十分享受做媽媽和照顧女兒，同時希望與女兒一起經歷不同階段。從小已是小網紅的梁浸浸，深受網民喜愛，問到女兒性格，Yumiko笑言：「佢一啲都唔貪靚，好唔鍾意扮靚，買裙俾佢都唔著，寧願著T恤短褲，可能佢對靚未有概念，不過阿浸性格好獨立，好有自己諗法，呢方面幾似我同老公。」
