張敬軒日前以學生look出席手機品牌「Galaxy練習生開學禮」活動，跟現場近七百名fans及觀眾唱歌兼大玩遊戲，軒仔於玩遊戲期間，更賣大包主動攬實fans兼面貼面，冧到fans暈陀陀。
軒仔在活動上以「模範學長」軒學長的學生look現身，全場觀眾亦通統穿着校服出席，夠晒隊形！抽觀眾玩遊戲前，原本軒仔有跳舞環節，不過他自覺不擅跳舞，於是便派出「軒公學園」的兩名練習生上陣，「我哋今日晏晝到場，sound test嘅時候我覺得自己跳得唔夠佢哋好睇，所以即時叫佢哋自己諗、自己編，呢件事都好『練習生』。將個台交俾你哋，佢哋係第一次上台，大家睇吓收唔收貨先呀。」
去到抽觀眾玩遊戲環節，除了跟fans合作、玩猜猜畫畫等遊戲，最令台下fans瘋狂尖叫的是，軒仔在「軒公許願池」遊戲中跟兩位女fans互動，所有觀眾入場前於紙上寫上希望跟軒仔一起達成願望。被抽中的第一位女fans想跟軒仔扮演電影《鐵達尼號》中男女主角Jack及Rose在船頭的經典場面，不過由於身高關係，軒仔要跪在女fans後面，從後攬着她，他更自帶風扇笑「自備海風」，引得全場大笑！這時場內更響起電影主題曲，軒仔便站起來再次從後抱着女fans，又面貼面，令她笑得合不攏嘴，並害羞地掩面，十分搞笑；另一位女fans則希望軒仔在她面前撒嬌，軒仔立即挽着女fans手臂，然後把頭挨落她肩膊並溫柔地說：「你唔好唔開心啦。」又引來台下fans起哄，軒仔更說：「佢個膊頭好好瞓！」
當晚軒仔其實只需要唱《隱形遊樂場》一首歌曲，但為了答謝現場觀眾的支持，他便額外多唱兩首歌。他提到曾經推出過一首以翻唱歌系列的專輯《Dahlia》，並大讚是屬於高保真級數的錄音專輯，「今日喺呢度重現《Dahlia》入面嘅一首歌，我印象中可能喺其他場合唱過一次，但呢首歌真係好少同大家唱，係嚟自鄭秀文小姐嘅《值得》。」當唱完《值得》後，台下大叫encore，軒仔說：「大家等咗咁耐，冇理由淨係唱一隻歌啦。想問大家嚟緊呢首歌想聽我原創定係翻唱嘅作品呢？」台下即歡呼聲不絕，軒仔續說：「我喺歌廳表演嘅時候，逢星期五、六晚我都會有一part係唱陳慧嫻小姐嘅歌，因為細個未變聲、青春期未發育嘅時候係女仔聲唱女仔key嘅歌，將以下呢首《傻女》送俾大家。」最後唱出《隱形遊樂場》時，為了照顧坐在後方的觀眾，軒仔跑到後場位置獻唱，非常寵粉！
