日前，張敬軒正式展開《The Prime Classics HINS CHEUNG LIVE張敬軒演唱會》美加巡唱，首站於拉斯維加斯舉行，這亦是繼去年倫敦三場、澳門十四場後的演出。
作為美加巡唱首站，這次場地位於拉斯維加斯Caesars Palace的The Colosseum，以往有不少國際級歌手曾於此場地演出，如Celin Dion及去年軒仔來看她演出的Adele，絕對是殿堂級場地。據知，場地已多年未有邀請華人歌手到場演出，難怪軒仔表示榮幸又興奮，而且亦覺得別具意義，「今晚可以企喺呢個舞台上面，好開心，我仲用Adele嘅化妝間同埋坐佢張櫈呀！」
雖然相距一年再於拉斯維加斯開show，加上日前微軟死機，令各地機場大癱瘓，但各地歌迷如紐約、芝加哥、洛杉磯、西雅圖及墨爾本等，依然排除萬難到場睇騷，令軒仔十分感謝，「多謝大家千里、萬里來到拉斯維加斯睇我演出，有啲要飛廿幾個鐘、有啲飛咗去某個地方，然後要坐十個鐘頭車到，各式其適以唔同方法抵達演唱會場地，好彩大家都可以齊齊整整嚟到！」
當晚演唱會歌單，除了新歌《青春告別式》，亦有不少軒仔的代表作，如《櫻花樹下》、《笑忘書》與《餘震》等，全部變成「大合唱環節」，當大合唱完《餘震》後，軒仔興奮地說：「你哋知唔知，啱啱嗰刻發生乜嘢事？我喺台度，好多朋友同我一齊唱呢首歌，突然之間見到呢位外籍女士，佢識唱《餘震》呀！佢真係好犀利！突然間令到我覺得自己好似一個外國明星，好犀利呀！我第一次見到有外籍人士唱我啲歌，除咗我『遮遮』之外！好神奇！我想話，你（外籍女士老公）真係好有福氣，你老婆愛你愛到連廣東歌都學。」隨即全場歡呼。
演唱會亦有握手環節，不過落台前，軒仔語重深長地着歌迷要冷靜一點，原來因為去年新加坡站的「陰影」，軒仔笑說大家不用錫住他，最緊要錫住支咪，「上次喺新加坡，因為大家太熱情已經撞跌我支咪，我支咪特登send去德國整，整咗我兩隻勞力士嘅價錢，所以希望陣間大家唔錫住我唔緊要，一定要錫住我支咪，知唔知？哈哈！我好易搞，但係我支咪難搞呀！」歌迷亦十分聽話，最後軒仔人與咪都安全返回台上。
此外，向來寵粉的軒仔這次亦帶了T恤送給歌迷，而且他更「效法」Adele去年演唱會上派發給歌迷T恤的方式，不過是「加強版」，「佢送禮物送T恤俾觀眾係有支槍嘅，一射就射到好遠，但今次我冇準備到支槍，但我準備咗一支炮！因為佢應該可以射到好遠，哈哈！好彩今晚唔係好多小朋友喺度啫，事不宜遲，呢個時候我請我支炮出嚟先，呢個美國friend好勁，佢可以射得好⋯⋯唔係，揈得好遠㗎！」隨後瘋狂將T恤拋向觀眾，現場氣氛熾熱。拋完Tee後，有歌迷大叫「拋埋軒仔」，於是「美國朋友」立即抱起軒仔作狀將他拋出，全場立即狂呼，最後軒仔安全於台上着陸，他更搞笑說：「嘩！嚇死我呀！你哋知唔知我咁大個仔，第一次俾人抱起！」引得全場爆笑。
