張敬軒12月將於澳門舉行7場演唱會，今日（17日）公開發售，反應熱烈得令賣飛網站一度冧server。開售前即今早凌晨四點多，有黑客試圖入侵售票網站，已經導致有三十多萬人次在網站凌晨排隊，酒店的技術支援部亦立即處理。到中午十二時正式開賣時，有三百多萬人次短時間內湧進網站搶飛，伺服器承受不了龐大fans湧入，隨即死機，經過十分鐘搶修，網站回復正常，全數門票旋即售罄。有見及此，貼心的軒仔為了不想歌迷辛苦搶飛，隨即宣佈加開6場，當中包括除夕倒數場，門票於下周二（21日）公開發售。
近日，軒仔積極籌備演唱會，頻頻開會：「希望今次有個盡善盡美嘅演出俾到大家。同時今次亦係我20周年series嘅壓軸show，之前做過幾個唔同嘅series，包括中樂團盛樂、The Next 20、Revisit等，所以今次加場，橫跨咗聖誕同新年，希望重要嘅日子都同歌迷度過。」
