電影《阿媽有咗第二個》氣勢如虹，票房已經超越三千萬，戲中作為神秘客串演出的古巨基，昨晚（3日）與導演 彭秀慧在ig直播，解構《阿媽有咗第二個》不少秘密，彭導指電影首次上映是在大阪，當時已有人知道古Sir是神秘彩蛋，但大家都保守呢個秘密，因為彭導曾經表示誰劇透就「殺咗佢」！而古Sir當日收到彭導邀請，講到他在戲中的角色是演「古巨基」，「古巨基，冇人會演得比我好囉，我最熟佢囉，我諗我應該會幫到手嘅…」當時大家講個信字，古Sir只知道演古巨基，不知道有什戲份，笑說：「唔知會唔會有接吻戲、濕身戲，問都冇問就一口應承了！」
彭導當時靈機一觸，認為《阿媽》是講歌手的故事，如果有位真實的歌手參演，在戲中為方晴加持就更perfect了，彭導想了一堆條件：啱年份、好肯提攜新人的、善良的、最好演過戲等等，選擇唔多，結果古Sir應承實在太好了！彭導特別翻看他與古Sir的whatsapp對話，她說：「第一次邀請古Sir參演已即獲答應，第二次再問古Sir可否與方晴合唱亦爽快答應，古Sir笑謂：「因為我覺得冇人可以扮到戲內的古巨基唱歌的，搵唔到代唱㗎喇，哈哈！」
彭導選歌時，原來除了《愛回家》仲有《初心》。古Sir直播期間，發現有網民問到《阿媽》版《愛回家》首段呼吸聲好大聲，但古Sir做監製估計係有特別意思，古Sir親自拆解：「冇錯係有特別意思嘅，我係想聽嘅人特別係聽住耳筒嘅，好似有人輕輕喺耳邊同你講嘢嘅感覺，所以前段我同姜仔嘅呼吸聲都刻意留番喺度，聽時感受到一種好似攬住你家人、你愛嘅人喺耳邊唱歌嘅感覺。」彭導亦透露錄歌時的難忘事，古Sir很強調因為新版《愛回家》是配合戲內的方晴先出現，所以古Sir特別安排歌中方晴的比重為先才合理，極之眷顧新人。
而古Sir客串拍攝日是煞科日，彭導知道該段時期古Sir忙於湊仔很少現身，只有一次在演唱會後台遇過，到拍攝當日見到古Sir容光煥發地出現，有種出山的感覺，彭導笑言勇奪了古Sir出關的第一天工作！
古Sir重提第一日拍攝見到姜仔，兩人的對話，姜仔說他和媽媽睇咗古Sir主演的劇集《情深深雨濛濛》三十幾次，古Sir聽罷驚訝到擘大個口得個窿，覺得他孝順乖仔！同姜仔傾偈覺得他在舞台上好閃亮，但在錄音室見到他是個鄰家男孩，「佢係問題少男嚟，都係問我拍戲多，我哋去錄音但佢問我拍戲呀…哈哈哈」姜仔又問古Sir面對兩位女主角現實中會點揀，古Sir唯有反問他「如果係你又點揀」，可愛的姜仔一樣話：「呀，我都唔識揀呀！」除了好奇拍戲嘅事，古Sir亦大讚姜仔用心又勤力做音樂，當日錄音過程極之順利，四、五小時便完成。
談到兩代歌手的分別，古Sir指當年是18、19歲藝訓班入行，約22歲做歌手，跟方晴姜仔差唔多。感覺年輕一代的他們已經好有才華好有想法，而回想自己當年則好單純只是很喜歡唱歌，簽約做了歌手慢慢實戰中學習，工作經驗慢慢儲落，而這個世代的歌手很多都真係好叻，很多還懂得自己製作，曲風多元化很厲害。
而在戲中舒文錄音室，觀眾見到的一排排獎座，原來唔係道具，彭導話當時想增加真實感，結果古Sir二話不說借出自己二十幾個獎座搬晒去錄音室，彭導笑謂簡直係「贊助」，古Sir笑謂：「都幾開心的，除咗我本人，我的獎都參與其中。」而彭導亦感謝張敬軒借出錄音室。
直播進行大概一小時後，毛姐突然驚喜現身！古Sir笑謂《阿媽》入面其實你有三個仔㗎，我都係你個仔，令人爆笑，而三人談起在錄音室的一段，都覺得成件事發生很自然，古Sir同毛姐真係似足並肩作戰多年的舊拍檔，更有觀眾搞笑問：「點解可以遇到古巨基在錄音室經過？」真實自然感十足，又有人問「點解方晴演唱會冇古巨基出現？」彭導笑謂：「只會有兩個原因，就係時間同資源喇！」古Sir打蛇隨棍上笑謂：「或者仲有一個原因，就係因為有下集！」網民即時起哄，彭導笑謂：「死啦，我講咗冇下集喎！」彭導話如果有可能都會係十年後，毛姐爆出一句：「阿媽死咗啦！」爆笑全場。