由鄭丹瑞（旦哥）與盧慧敏（Amy）主演的寰亞電影《得寵先生》，昨日（9日）與香港愛護動物協會（SPCA）舉行兩場「狗狗友善慈善放映會」，逾百位觀眾帶同愛犬進場一起睇戲，SPCA會長傅明憲更身體力行，帶同三隻愛犬撐場。
旦哥謝票時一度哽咽，表示：「香港拍電影已經好難，仲要揀個咁難嘅題材。但正正就係難，香港電影愈難愈唔忿氣，先至會有大大小小嘅電影產生。」工作人員馬上為他遞上紙巾，旦哥再說：「好少何謝票謝到咁鬼樣！最感動係『人寵共融』，我嘅電影可以做到，大家帶住心愛嘅毛孩，好enjoy咁睇咗107分鐘，多謝大家！」觀眾席有狗吠了兩聲回應，旦哥笑說：「我明，你係話『唔好客氣』！」
Amy表示當進入戲院時，見到人狗同場的畫面已經熱淚盈眶，「因為拍呢部電影最大嘅訊息係平等對待生命，所以見到大家一齊坐、一齊睇戲，真係將毛孩變成家人，我好感動！」旦哥回憶做過無數次其他電影的謝票，每次都好興奮，希望令現場氣氛高漲，「但今次，係第一次，工作人員要遞紙巾俾我抹眼淚。狗同小朋友係最難拍，導演連跨兩個難關，我有幸同佢哋一齊走過難關，完成呢件事。然後見到製成品，有毛孩有主人一齊睇、一齊拍手掌，同喜同悲，係我最大最大滿足感。我契仔帶咗狗狗入場睇，佢話狗仔好似識睇字幕，好認真咁睇戲，個畫面好美麗。」本身對狗毛敏感的旦哥再分享說：「我所有嘅敏感，都唔及我嘅滿足感！」Amy補充：「我哋同觀眾都眼濕濕，證明呢個畫面真係好有溫度。」旦哥點頭贊成，並說：「證明我哋做啱咗！」
有觀眾於完場跟旦哥表示代入了他演「佳叔」的角色，甚至忘記他在演戲，旦哥說：「我實在有努力過！好想大家睇到嘅唔係鄭丹瑞，而係角色，一個獨居老人。戲中有一句對白令我特別心痛，『連人我都唔要做朋友，做乜同狗做朋友？』一個老人家去到咁蒼涼。所以我哋都要留意身邊嘅老人家，打個電話去關心佢！」Amy亦表示因為這部電影才接觸關於獨居長者的問題，「香港人無論咩年紀，都好似缺少咗表達自己嘅習慣，然後就有誤解。《得寵先生》除咗係一部講流浪動物嘅電影之外，仲係講每一段關係，都應該多啲溝通、了解和包容。」
有不少主人都帶同狗狗跟Amy合照留念，超愛動物的她來者不拒，甚至抱起小狗和蹲在地上跟大狗合照，狗狗對她亦非常熱情，狂舔她下巴和臉龐，Amy好享受，興奮高呼：「我第一次畀咁多狗錫錫，今日真係好幸福呀！」
戲中唐狗演員Little早前因病去逝，主人Suki昨日表示好開心在電影裏再見到Little，她感謝拍攝期間，團隊對Little的照顧和愛護。
