思家大戰｜關禮傑一家四口上節目 囡囡冇信心贏？

關禮傑一家四口日前到電視城錄影李思捷主持遊戲節目《思家大戰》，記者問到關禮傑今次全家出動會唔會好緊張，佢就答對比之前同囡囡關楓馨合唱，呢次玩遊戲真係覺得輕鬆好多，冇咩心理負擔，仲話將贏大獎嘅重任交俾阿囡。

雖然爸爸關禮傑將拎大獎願望交托俾阿囡，但關楓馨自己就話冇咩信心贏大獎，因為佢連答問題都要英文翻譯，又唔知大家嘅提示係講乜，所以冇信心贏。不過如果問佢英文問題，佢就話自己有優勢喇，加上轉數快嘅秘密武器車婉婉幫忙，都有少少勝算嘅。