由李思捷主持及監製的《思家大戰》第三季，今晚（22日）播出一集，有吳若希（Jinny）率領的「香港人在北京」隊，成員包括吳業坤、蔡潔、傅嘉莉和陳星妤，對戰黎諾懿率領的「隨懿李請客」隊，成員包括高海寧、劉穎鏇、李家鼎和「一蚊Joe」游茛維。
「隨懿李請客」隊由台慶綜藝節目《隨懿深度行》、《請客必食18道菜》及《思家大戰》核心成員組成，《隨懿》代表除了有主持黎諾懿，還有兩位靚女嘉賓高海寧及劉穎鏇，諾懿介紹節目時非常Hard Sell：「我會同高海寧、李佳芯、黃翠如同埋劉穎鏇一齊去馬來西亞玩，佢哋會將心靈上嘅嘢交晒出嚟！」高海寧聞言先是大笠高帽：「睇吓我個名，我係諾懿個Friend，咁樣就可以多啲嘢做㗎喇！」之後再搞笑補充：「對住佢（黎諾懿）拍嘢好有安全感，俾佢撩吓撩吓，真係撩到啲嘢出嚟！」不過當高海寧回答被撩到什麼時，竟惹來全場噓爆。至於劉穎鏇，則坦言為諾懿獻出了珍貴的第一次‥‥‥
代表《18道菜》的鼎爺簡單一句已道盡節目賣點：「淨係海參都有六款做法！」思捷直指步驟繁複，鼎爺即搞笑回敬：「呢啲都唔煩，最煩嗰個係你，咁吟沈！」
至於代表《思家》出戰的一蚊Joe，則獲思捷感謝：「一蚊Joe為我哋做咗暖場主持兩年，差唔多集集都有佢份，好多謝佢。」
《香港人在北京》代表吳若希自爆舉行音樂會期間全靠碰巧同樣身在內地的思捷支持及鼓勵：「如果唔係一個人好lonely。」思捷回應：「唔係吖，你依家有咁美滿嘅家庭。」豈料進擊的若希竟借勢說：「爭咗你。」嚇得思捷亦忍不住「吓」了一聲。
今集問答環節繼續爆笑，首條問題「老公自己一個湊BB，老婆最擔心佢搞唔掂咩嘢？」，兩孩之母Jinny竟大嗌好難答兼連番答錯，最終要由人生閱歷豐富的鼎爺出手補中！另一條問題「同一班Friend同枱食飯，你做咗啲咩會令佢哋好反感？」，坤哥回答時笑笑口說：「呢個我好有經驗，飲醉酒！」即獲思捷擊掌相認：「同道中人！」
填充題「除咗北京，仲有乜京？」亦考起全世界，兩隊陷入苦思瘋狂答錯，Jinny大嘆：「冇乜人好似我哋咁冇文化！」坤哥則無厘頭爆出一個與「女士」有關的答案，引爆全場嘩然。