江海迦（AGA）經歷疫情一波三折取消演出，去年終一圓紅館夢，今年初推出入行十周年專輯《Agatha》，為最新派台歌《Why you》接受商台節目《星光背後》專訪，大方公開與未婚夫鄭子邦的感情事、以及分享自己對婚後工作的想法。
AGA去年的兩場紅館演唱會，均獲未婚夫鄭子邦現身捧場，她表示很感恩對方的存在：「我同佢性格好唔同，我好需要一個可以喺身邊扶持住自己嘅人，佢會支持我做自己相信嘅事！經歷過咁多高高低低，我好開心佢可以睇到兩場紅館騷！」她坦言要不是去年開騷前被傳媒爆料，與鄭子邦已於新西蘭註冊結婚，決不會公開與未婚夫的感情事，又澄清二人只是訂了婚，她原本打算待婚後才公佈消息：「其實出道以來，我都好少講自己感情事，唔係想專登收埋，反而係想觀眾focus我嘅作品，我唔想lost focus，同埋始終另一半唔係公眾人物，點都會影響到佢生活。」
提及未婚夫過去與圈中人交往過，亦先後與多位女藝人傳出緋聞， AGA坦言這些歷史不會對二人的關係構成壓力，更不介意對方有過去：「我其實好感恩我哋之間嘅過去，先成就到一個適當嘅timing去一齊，兩個人能夠走埋一齊，係因為大家價值觀好相近，而呢啲價值觀冇過去就唔會有，所以我好感恩佢嘅所有過去。」
至於訂了婚後計劃何時正式註冊，AGA表示很有可能會突然發生，「因為我今年嘅工作安排已經full咗，喺訂婚嗰陣，佢都知我有好多嘢想做，佢叫我喺一個right timing先同佢講。我哋大家都好直接，所以我覺得係時候就會做，就會同大家講。」AGA指另一半絕不會禁止她婚後繼續音樂工作，「如果他會禁止，就不會是我的另一半！」她亦透露雖然很喜歡小朋友，但未有計劃生育下一代。熱愛唱歌的AGA表示婚後仍會繼續歌唱事業：「其實音樂係我嘅profession，我亦都好喜愛音樂，只要大家仲聽緊我唱歌嘅話，我都會繼續！就算我有一日唱唔到，我都會做幕後嘅工作，幻想唔到我嘅生命會同音樂分割開！反而我即將步入人生下一個階段，可能寫嘅歌會唔同！」AGA現正籌備下一張專輯，預告今年會陸續推出不少新作。
