2018年參加《全民造星》的涂毓麟（Oscar），翌年簽約環球唱片以歌手身份出道，識作曲兼彈得一手好鋼琴的他，選擇以多方面發展，唱歌、主持和拍劇樣樣都試。
去年Oscar參加內地戀愛真人騷《心動的信號7》，意外打入內地市場，去年更參演無綫重頭劇《黑色月光》及《執法者們》，入行7年，事業終於露曙光，Oscar無悔當年放棄百萬年薪入行做歌手，他說︰「的確條路冇想像中行得咁順，但我冇後悔！」
現年26歲的Oscar，有樣有才華，2023年為《香港小姐》擔任表演嘉賓，負責彈琴伴奏，雖然在台上只靠邊位置，但當時已成功吸引內地網民關注，激讚他「靚仔過AI」，掀起一陣熱話，也因此被內地電視台睇中，邀請他參加戀愛真人騷《心動的信號7》，成為6位男嘉賓之一！
機會是留給有準備的人，雖然以歌手身份入行，但Oscar絕不抗拒任何演出機會，他說︰「入行嗰陣，一定抱住好想做音樂、想做唱作歌手，但呢一個行業就係咁，首先要俾人認識你先，加上呢個年代競爭太大，你都唔知自己邊一個範疇會做得好啲？所以我一直都抱住有機會就做嘅心態，同埋有好多時每做一件事，往往都有得著嘅，無論拍戲做綜藝又好、做主持又好，做音樂都需要有呢啲體驗。我2025年目標就想出返多啲歌，真係做返個唱作人！」Oscar近日一次推出2首新歌《心動的寓言》和《心動的痕跡》，都是因為參加內地戀綜而創作出來，亦是Oscar向女友表白的情歌。
這次參加戀綜，除了人氣急升外，Oscar更有意外收穫，就是成功「脫單」，與24歲財經新聞主播孫樂言成功配對，《心動的痕跡》就是兩人拍拖6個月的紀念禮物，「我拍呢個節目嗰陣，都係保持一個開放式心態，覺得遇到啱咪試下囉，遇唔到嘅話，咪當一班朋友去個旅行！其實好耐都未試過咁多人一齊住埋同一間屋，上一次已經係喺英國讀書嘅時候。」
提到女友，Oscar甜到漏，「我同佢都係每件事考慮得好清楚先開始嘅人，喺節目入面，大家都相處得好舒服，佢係一個好有規劃、好有自己諗法，又好聰明嘅女仔，但私下相處時候，又有小鳥伊人一面，同埋好靚女啦！」早前Oscar更與女友為新歌拍攝MV，這次是孫樂言第一次來香港，Oscar說︰「雖然行程好趕，但帶佢去咗好多景點，包括赤柱和到中環坐電車。」女友想品嘗香港特色茶檔，Oscar就特意挑選了大坑舊式茶檔進行拍攝。
今年2月，便是Oscar入行的第7年，他坦言時間飛逝，「有好多想做嘅嘢，其實都未真係做到，的確條路冇想像中行得咁順，但對我嚟講，我都係覺得首先要做好自己，等到機會來到就好好把握！其實參加《造星》嗰陣，我都冇抱住入行心態，當時純粹覺得暑假有個break，有個節目我又鍾意表演，我又鍾意唱歌彈琴，咪去玩吓囉！」
有「學霸歌手」之稱的Osacr，學歷非常亮眼，曾就讀喇沙書院的他，亦是香港演藝學院鋼琴系學生，師承黃懿倫，中二考獲獎學金到英國貴族學校之首哈羅公學，並獲英國皇家音樂學院教授相中深造琴藝。雖然中學以狀元成績畢業，獲英國多間著名學府取錄，但Oscar選擇回港入讀香港科技大學「神科」環球商業學系，並以一級榮譽成績畢業。
Oscar說，同學畢業後大多做投資銀行，或者是諮詢公司，有些在畢業之後的第一年，已經搵到年薪百萬。問Oscar有沒有後悔入行？他說︰「我係冇後悔過嘅，特別係呢幾年新媒體崛起，身邊有做iBank嘅同學，都嘗試轉做KOL做博主，加上我鍾意自由度大嘅工作，我一向都唔覺得自己只會做一個行業嘅人，我覺得人生要有好啲體驗先叫圓滿！我都有副業，一向都好想去做同創業有關嘅嘢，未來醫療係一個好重要板塊，需求真係好大，我同大學一位教授研究AI牙科方面嘅嘢，呢幾年亦慢慢去做呢件事，算係一個start up，都叫好彩有幾間大嘅institution（機構）、香港政府學院都有投錢。」
化妝、髮型︰Matt Li
服裝︰Zara
場地︰露營生活Camp Life
