馬德鐘、黃智雯、張曦雯等今日出席新劇《再見·枕邊人》活動，張曦雯表示今次已第三套與馬德鐘合作，故有一定的默契，「我哋由《跳躍生命線》開始已經合作，佢睇住我大，好清楚我嘅優點及缺點，因為我平時係比較平靜，今次演出需要有好大起伏。」
她今次更首次挑戰奸角，「雖然劇本寫我好似反派咁，但我根本唔係第三者，因為黃智雯明明死咗七年，只係無啦啦翻生，應該佢先係第三者，因為劇本寫得好，自己為咗保護家庭都不擇手段，但我真係唔覺得我係奸角。（怕唔怕俾觀眾鬧？）當然愈鬧愈好，即係觀眾都好投入睇，我自己平時都很喜歡睇奸角，希望大家睇完會憎我。」劇中她與黃智雯有場互摑戲，「你哋睇完就知我唔惹少，有場我同Mandy互摑，都拍咗好多下，因為要拍唔同角度，我哋拍前都有練點去摑對方，怕唔夠力摑又唔似，所以都叫佢狠狠咁摑，因為劇中都有講我哋摑完會有掌印喺面。」