入行廿四年的方力申，剛出道時歌影雙棲發展，近年轉戰拍攝電視劇，但依然以歌手身份密密登台賺錢，早前他擔任國內婚禮表演嘉賓外，一連獻唱《好心好報》與《無雙譜》等多首歌曲，在台山站演出時，更在戶外頂着烈日獻唱《好好戀愛》，表演相當落力，獲得大批國內歌迷支持。
6月1日起他將在國內舉行四場音樂會，是入行以來首次以賣票形式開騷，方力申今日（15日）出席劇集《逆天奇案 2》宣傳時，他表示相當緊張，「做個人買飛音樂會未試過，今次是第一次，好緊張！今次做的原因是因為有劇播，都想幫忙加緊宣傳，6月1日開始在國內分別有四場個人音樂會，會花半年時間巡演，所以依家都開始聽返以前自己嘅歌，有好多回憶湧現，發現自己以前把聲都幾特別，依家長大了，會有不同的唱法。」
問到可有為開騷作準備功夫？他說：「要練聲！平時登台可能只唱四、五首歌，但今次唱廿幾首，所以又要開始跟契媽勤力啲學唱歌，同埋要減肥，希望可以減十磅左右，想上台瘦啲，但就冇打算除衫騷肌，不過因為我成日都臨急抱佛腳，所以減肥會辛苦少少。」