楊千嬅在昨晚播出的節目《有個閨密叫祖藍》中，指經常被老公丁子高整蠱，發生得最多的整蠱事件是「石春藏手袋」，試過去日本餐廳食飯，準備離開前去洗手間，老公就將餐廳門口的石春放入她的袋。千嬅又指丁子高試過扮狗叫令她當眾失儀兼失魂：「佢行行吓街喺後面用隻手拍我隻腳，然後扮狗叫喎，我以為真係有狗咬我咪大嗌咯，咁我一大嗌好大聲㗎嘛，成條街望住我，佢咪喺度笑咯。」
相反年僅十歲的囝囝丁進諾（Torres）思想成熟、且勁識氹媽咪開心：「有次母親節佢寫卡俾我，下款寫Unknown son，我搲晒頭問佢咩嚟，佢話：『我想俾個驚喜你，但我又驚你唔知係我，咪寫埋Son咯』」、「我個仔會整蛋炒飯我食，佢鍾意煮嘢食嘅，我好感動㗎。佢仲話：『你可唔可以唔好成日話減肥，夜晚要食飯，如果你唔食飯我都唔食。』其實我只係夜晚唔食澱粉咋嘛，佢以為我絕食。」
為了管住媽咪飲食，Torres更會與丁子高「聯手」：「有時丁生唔喺度我會飲啲佢唔鍾意我飲嘅嘢，我個仔會影相send俾老竇，仲話：『爹哋話唔俾飲』，我就話：『俾我飲一啖啦』！」並笑指與阿仔相處後，才學懂「掛念原來係要講出嚟」。
另外，千嬅加長版坦言很感恩做護士，讓她學懂與人相處：「由細到大我讀女校，開頭同男人講嘢好驚㗎。直到喺醫院做嘢，因為要照顧好多唔同嘅人，就明白點樣去做人同埋個社會係點。」
千嬅亦很難忘初入行於華星打拼的日子：「我哋嗰時做好多宣傳，係咁跑通告，一大班人唔同路線用同一個司機，一齊走天涯。」她指與華星另外兩寶陳奕迅及梁漢文關係儼如「屋企人咁熟」：「我唔使驚佢哋嬲，咩都會直接講。」她又感激師姐梅艷芳當年對他們這班新人照顧有加，並教曉他們全公司上下是大家庭：「佢對我哋新人好好，因為做新人冇咁上下知名度好難有自己project，阿姐就會帶埋我哋出去攞演出經驗同埋見吓人做吓訪問。」
