今年六月，Tyson Yoshi在加拿大溫哥華舉行個唱，拍拖六年女友Christy也同行，他為Christy唱新歌《Would You Be Mine？》並邀上台，突然跪地求婚，Christy感動流淚答應。
「你問我邊一刻認定對方？冇喎，overall去到某個位，即係初初一齊嘅時候都仲會諗，如果散咗之後點呢？因為未stable，咁大部分情侶都會咁，但係到大概兩三年左右，就開始冇咗呢個諗法，同佢拍拖之前，我係拍唔到長拖嘅人，我都好surprise，之前紀錄最長都係半年，嘩！咁應該係佢囉，我自己心諗呀，應該都搵唔到第二個可以頂得我順，有時連我阿媽都同我講︰『我真係頂你唔順呀！你啲脾氣你可唔可以唔好咁呀！』真係得佢頂得我順，例如我好唔鍾意排隊，我哋有時去旅行去到一間餐廳，佢一見到有好多人排隊，就已經拖住我轉頭走，佢真係好了解我，尤其是我肚餓嘅時候，其實好唔好味係其次，總之我要馬上食飽先，佢會話︰『唔緊要啦，我下次同我啲姊妹去旅行先再食囉。』媽咪都覺得surprise，拍拖兩年係佢、三年係佢、四年都係佢，就知道係佢囉，而家媽咪有咩會同佢講，多過同我講，因為佢驚我好忙，有湯飲就會搵我未婚妻叫我返屋企。」
Tyson的婚禮定於明年七月在歐洲舉行，他說︰「最近有同婁峻碩傾吓婚禮點搞，我哋都係差唔多時間，大家分享吓。」
Tyson續說︰「籌備婚禮有冇拗撬？少少啦，重點我先會跳出嚟，大部分交俾佢搞，係佢個show嘛，我自己咁睇啦，我當日係做演員，我係男主角，佢係導演加女主角，冇乜驚喜㗎喇，我覺得求婚嗰一下已經係俾public睇完，之後其他就屬於我同佢，大家到時喺social media睇到就睇到啦。」婚後Tyson想過幾年二人世界，希望在三十五歲前生小朋友，「我覺得係要做嘅事，可能我骨子裏都比較傳統，屋企係福建人，咁我老竇又排行最大，係有壓力嘅，尤其是阿爺都老喇，精神有時唔係咁好，生仔生女都好，男仔的話，我會想佢take care到自己，如果我生女，我會成日心掛掛。」Tyson和未婚妻都是七月生日，兩人婚期定在七月是因為拍拖紀念日，他說︰「最好小朋友都係七月出世，乜都七月搞掂晒，唔使煩。」
明年Tyson將會忙到出煙，因為他計劃在婚禮之後，緊接在香港開騷，「對上一次做大show已經係二二年九展四場《My New World Order》，希望今次可以開大啲，其實近排我係刻意收埋自己，今年喺香港可以話係零演出，去咗其他地方走tour，講真，如果逢禮拜五都見到我唱歌都冇乜好睇啦，我係比較鍾意唱細場，始終我嗰種音樂曲風，要同大家interact（交流），大家一齊玩一齊high一齊跳，咁所以點解好多人問我你會唔會開紅館呀？當然呢個地方係iconic，但係比較危險，座位太斜，一齊跳真係危險，係我要去考量嘅地方。」
繼上首求婚歌在社交媒體洗版後，Tyson與派偉俊再度合作，推出今年第二歌《F**k You & Your Friends》，正是他踏入三十歲的親身經歷，「二十九跳到三十，我覺得係有分別嘅，觀察身邊啲friend又發現，好似逢十，人生總會遇到一啲背叛，無論情侶背叛又好、生意上又好，喺我二十九歲就發生一件，要用整整一年時間去overcome嘅事，我發現原來我係要一路輸出呢啲情緒先釋懷到，首歌未出未開始做訪問，我都唔係好釋懷，呢排講多啲，就覺得算啦，過咗去喇，首歌係講朋友之間的背叛，又係朋友又係工作上面夥伴，冇諗過可以改變自己咁多，亦影響到整個團隊，可能個天要我去下瘀血，整個圈子分成兩邊，講真，兩個人鬧交，一班朋友入面總有人會歸邊，咁所以就係『And Your Friends』，我係一個好極端嘅人，你唔係企我嗰邊，咁即係企對方嗰邊啦，搞錯呀食屎啦，我係咁樣，咁所以成個生活圈子都改變，當然有金錢involve，我做呢一行，我唔係純為錢，因為我由細到大都無諗過我將來要企喺舞台上唱歌，純粹係個天俾個機會我，我就捉住個機會盡力做到最好，而對方覺得喺香港已經好well established，你咁樣做少少都有錢賺啦喎，但我想行出少少，去吓其他地方，俾人認識Tyson Yoshi嘅音樂，不過對方覺得我同你去台灣，錢又少時間又要多，又冇錢賺，老實講，錢其實再賺咪有囉，機會冇咗就冇㗎喇，最傷心就係，原來一直只係我當佢係好朋友，唔緊要啦，經一事長一智，三十歲大個仔喇。」
攝影協力︰Kapo Blue
花絮攝影︰洪志富
髮型︰Jim Tse @hair Corner
化妝︰Carmen Chung
形象︰Tung Kam
形象協力︰Haley Chau
服裝︰BOTTEGA VENETA、FENDI、GIVENCHY、LOUIS VUITTON
珠寶︰MIKIMOTO
