Gin Lee李幸倪新歌《告別煤氣燈》昨晚（3日）正式上架，歌曲以「情緒勒索」為主題，撕破以愛之名的魔咒。Gin透露從外國真人騷、去年贏得奧斯卡的楊紫瓊及關繼威的身上獲得啟發，加上自身經歷，希望藉新歌鼓勵歌迷，學懂如何平衡聽取身邊愛你的人的意見，以及聆聽自己內心真實需求，這是個一生的課題。
Gin更表示跟填詞人鍾說，討論了很久關於歌曲的內容，「就係要衝破一啲你最親嘅人，可能係你屋企人、你最好朋友，或者你另一半，有時佢哋會唔小心去情緒勒索你，要衝破佢哋俾你嘅所有枷鎖。我哋要over邊啲係我哋要聽嘅說話、邊啲係唔啱嘅？我哋就要去跨越呢啲嘢！你要行出呢個陰霾，跟住先可以有機會去做到你想做嘅嘢。」
由於歌曲講述較深層議題，Gin希望MV有視覺上的衝擊，「好似真實同科幻之間，所以有啲場景，你會見到有啲抽象、有啲意識形態。」MV主要分為三個場景，包括玻璃屋、藝術品及扯線公仔，Gin逐一解構，「第一個玻璃屋場景，佢好似一個好靚嘅水晶球，但係如果住一個人喺裏面，又係咪咁靚呢？定係一個捆綁呢？我哋用呢一種contrast去帶出，『咦，其實好似有啲嘢喎！』然後Gin化身成藝術品，而男主角梁仲恆現身，他將Gin打扮得十分漂亮，當作藝術品般展現人前，「但係呢一個又係咪對我最好呢？定係喺佢心目中覺得咁樣係靚，我就要接受呢種靚呢？」最後扯線公仔是最明顯的一個表達，除了自己被操控，原來男友同樣被操控着，「一個深層意義，佢做嘅嘢對我嚟講係一個傷害，但其實佢自己都係一個受害者，所以係一個好壞嘅循環，不停輪迴，將呢個傷害不停loop。」
Gin表示MV中「水晶球」的靈感來源，是受到1944年的一部電影《Gaslight》（恨鎖瓊樓）所啓發，「我都特登去睇咗呢一套電影，電影裏面，女主角受到情緒勒索，佢老公不停去話佢精神有問題，搞到佢開始唔相信自己，呢套電影我哋拎咗少少inspiration，就係頭先講水晶球裏面，你見到啲燈閃吓閃吓，跟住又有煙，但當我同男主角講：『你見唔見到啲燈閃吓閃吓？』佢就話冇事，係我諗太多；同時亦都係向呢套電影致敬，因為始終《Gaslight》呢個term係呢部電影。
