比賽當日Arvin特意比原定集合時間到達學校，原來是為了爭取時間，先跟校長及老師們影相兼傾偈，隨後一眾師弟妹進入禮堂見到Arvin後，亦一擁而上爭相合照。受到師生們歡迎，Arvin坦言十分幸福，「我覺得我係幸運嘅，亦都係幸福！我成日都覺得離開咗一個地方、暫別咗一個社群之後，俾人記得係一種福分，尤其好多都係喺我成長路上，對我嚟講好重要嘅老師，我好珍惜呢份緣份，多謝佢哋令到我有種『哎吔你返嚟啦』嘅感覺！」
今次羽毛球賽制共三回合，分別有歌手跟學生對打，亦有歌手隊對戰學校隊，總成績將計入「龍虎榜」，巡迴比賽完結後，Gin跟Arvin便會到獲得最高分的學校唱歌表演。比賽期間，Gin十分投入，除了「食波餅」更飛身救波，搞到撞瘀膝頭，「依家行路都仲有啲痛！好開心，見到啲同學仔，可以同佢哋一齊互動，佢哋反應又非常之熱情，所以我興奮得滯，都提咗自己唔好咁搏命㗎啦！」
除了因為同學們的熱情，Gin笑說懷疑Arvin有「放水」 之嫌，「由於我嘅隊友Arvin有可能、懷疑佢想偏幫佢嘅母校，想最後可以返嚟唱歌，所以為咗公平多少少，我就出多少少力咁囉，哈哈！」連比賽主持劉若寶（Polly）亦說：「我咁啱企喺Arvin個位，我睇到個波明明喺佢附近，佢係好輕易就接到，但佢特登打歪少少，因為平時我見佢打波都好勁，啲波基本上佢都接得晒，但唯獨有幾球無啦啦接唔到，仲要俾啲好驚訝嘅反應，可能真係唔覺意放咗少少水！希望Arvin會反省吓啦，哈哈！」面對「指控」，Arvin未有否認，只笑道：「回鄉探親點都要讓少少嘅！但係童叟無欺，我向燈火發誓，淨係讓咗兩球，其他全力以赴㗎，只不過技不如人、狀態不佳，抱歉各位，嗚嗚⋯⋯」
已畢業五年的Arvin，今次回到母校進行活動，感受特別深，「今次我自己行上禮堂，可能因為曾經日日都喺度返學放學，就算隔咗五年返嚟，個感覺都好似尋日先行完咁，人生第一次有呢個咁奇妙感覺！好似乜都變咗好多，但又乜都冇變咁！」比賽結束後，Arvin在校園內遊走一遍，「因為驚影響到同學上堂，所以範圍好有限咁行咗一轉學校，仲撞到自己中學同班同學，有啲係嚟見工，有啲已經係返番嚟母校做老師，個感覺好奇妙，大家用唔同身份再聚首一堂，有種令人為之動容嘅力量！」