李靖筠（Gladys）好好彩。由模特兒、走勻Viu、TVB拍劇，再簽約英皇都機會不斷，20年接拍葉念琛的《我的筍盤男友》擔正演「阿寶」，近日在新片《電子靈》再做女一，今年更獲英皇力捧歌影發展。Gladys說：「其實我第一套戲好似16年㗎喇，我有時叫自己做新演員，都有少少慚愧，我好感恩仲繼續有機會！」好彩是今次拍恐怖片，並未遇上怪事，反而不及之前拍靈探節目時驚嚇；更好彩是戲中與前輩龔慈恩演母女，Gladys坦言「多咗半個阿媽！」
靈異恐怖片《電子靈》中，Gladys演一個網紅YouTuber遇上手機app恐怖事件；現實中的她不算「低頭族」，但她承認social media在現今世代很重要，「我直情覺得social media，依家係我哋嘅comp card（資料卡），依家冇咗social media唔得，生意又喺social media度發生，宣傳都係靠佢，時代唔同咗好多！我好懶update（IG），唔係好靚就唔想post，我都想捍衛自己instagram排版係好靚呀！我本身唔太鍾意玩電話，因為我覺得好攰呀，我都係鍾意面對面溝通嘅感覺多啲！」
首度接演恐怖片，好彩的是拍戲現場沒有怪事發生，倒是她之前為KB（李健宏）拍網上靈探節目，尤如「開咗個掣」一樣！「我覺得嗰一次經驗係啟蒙，因為以前自己搬出嚟住冇乜錢，我以前住喺殯儀館隔離，但我從來都冇撞鬼；嗰次我去咗靈探之後，好似開發咗我嗰方面嘅censor！嗰次去咗一間喺山頂廢置咗好耐嘅屋，叫做龍廬，我哋去到一路都冇乜嘢，一入到去我隻耳朵就開始好痛，好似喺飛機好大氣壓咁樣，後尾有師傅就話，原來一路都有嘢『控』到我好埋！」
托賴冇養家壓力
有了靈探經驗，接拍鬼片冇難度。今次在戲中除了有連串驚嚇場面，亦有溫情感人一面，她與龔慈恩演母女，Gladys說前輩一點架子都冇，「龔姐好nice，完全冇架子，佢好多嘢都會提我，呢度走機位，或者咁樣行可能好啲，佢都好樂於同我傾，點樣做好嗰場戲，所以我好開心。其實拍下拍下，佢好似我半個阿媽，我都會問佢，佢嗰排好似腳痛，我都會話，你啲風濕好啲未呀，總之佢嗰時唔係好舒服。佢關心下我、我又關心下佢，所以真係有啲bonding，所以做最尾嗰場佢走嘅戲，我真係覺得佢係我阿媽，覺得當你至親要離開你，其實個痛真係好大！」
現實中，好早已經搬出來獨立生活的Gladys，與父母感情都習慣埋在心中，「其實好坦白講就係好typical香港家庭，唔會話好close，但係佢哋好錫我，我又唔係會成日表達I love you嘅人。我都好開心，屋企人非常之support我！托賴我冇好重養家壓力，盡量都會多啲約下佢哋食飯，多啲返屋企食飯。我覺得以前細個冇咁識珍惜，依家人愈大就愈覺得，其實好難能可貴，世界上冇比你爸爸媽媽，更加無條件去愛你嘅人，人愈大先識得咁諗。以前細個會覺得好煩呀， 係咁問我做嘢做成點，點講俾你聽啫，依家大個咗就會珍惜，同屋企人一齊嘅時間。」
今年29歲的Gladys，由做模特兒入行開始，2016年接拍ViuTV的《三一如三》，又為當時的奇妙電視拍下《熱戀100天》， 2017年經模特兒公司簽約無綫部頭約，拍了《跳躍生命線》，一年後結束合約，她是近年少有可以走勻幾間電視台的藝人，到了19年才正式簽約英皇。Gladys回想當初第一次見Mani（霍汶希）時亦覺得搞笑，「我完約有去見唔同公司，有個朋友介紹咗我見Mani，我最深刻感受就係，之前見過好多唔同公司，佢哋都話唔好做音樂，音樂好蝕錢㗎，你專心拍戲啦，我本身都疊埋心水專心拍戲囉！我見Mani嘅時候，佢問我有冇showreel，我冇剪到showreel，但我嗰時YouTube就有我拍《跳躍生命線》一啲片，我就俾佢去睇，咁啱嗰一場係我自彈自唱，然後佢話你識唱歌㗎咩，不如簽埋你做歌手啦！我嗰時覺得好似搵到一線生機，竟然有人肯俾錢我出歌，所以我好感動。」
簽約至今4年，Gladys歌影雙線進行，自小愛音樂，大學年代已經組隊唱歌的Gladys，問她最愛是否都是唱歌？她笑說：「哎吔，唔好迫我揀啦！我真係唔想揀先兩樣都做呀嘛！我兩樣都好鍾意，可能我喺演戲上面，我有好多嘢積埋咗，我唔知點樣可以express返出嚟，我就揀音樂囉！音樂係一個我宣洩嘅渠道；但去演繹其他人嘅生命，我又覺得幾好玩喎！老實講，我覺得呢行好難plan，好難話三年之後，我就要升做manager，呢行實在太講唔埋，所以我覺得都係open for anything，有咩發生就由得佢發生！」
髮型：Cooney Lai@hairby_cooney
化妝：Kineks Ho@ki.neks_ho
場地提供：@keeprollin_studio
