李龍基強忍淚水說：「好多事我都唔知原來咁大鑊，我以為只係逾期居留，唔係大件事。原來好多事，我都唔知。」並指從沒懷疑過Chris，只嬲對方有事不跟他商量。
前後逗留了約20分鐘後離開的李龍基再受訪，揚言等王青霞一出來就結婚，並說︰「經過呢個教訓，我相信佢一定會變番好，唔會再有咩事唔同我商量、欺騙我。我相信佢唔會，呢個教訓好大。」
對於外界質疑王青霞為錢才跟他一起，李龍基當天發誓，說二人相識多年，對方從沒在他身上斂財，否則不會發展到今天。對於王青霞涉偽造文件，李龍基指未婚妻其實都是受害者，在申請其中一張證書上受騙，他會找出證據為未婚妻洗脫嫌疑。
李龍基又謂王青霞有道歉︰「佢覺得累咗我，我覺得唔係。既然發生咗，我會堅強面對，希望佢都係。唉，希望佢受到教訓，重新做好人。我唔需要問佢仲有冇嘢呃我，如果佢經過咁大挫折都唔坦白，我唔可以原諒，但我感覺到佢已坦白一切。」他自言年紀大，不知道明天會發生什麼事，突然「走」了也不出奇，因此王青霞疫情期間不想隔離，故他嘆謂︰「可能係我間接累咗佢。」
李龍基不明白為何那麼多人要針對王青霞，令事情愈變愈大，不排除有人寫信舉報王青霞，令入境處展開調查。李龍基知道外界擔心他受騙，重申未有將7個物業轉名至女方名下，他7個物業是給了前妻作為離婚補償。李龍基強調︰「我依家名下冇物業，錢又唔多，佢仲跟住我，咁就證明佢唔係為我啲錢，佢真係鍾意我呢個人，鍾意我性格，大家興趣相似，至合得來，佢搵到個Right Man。」
李龍基坦言王青霞在這宗官司沒什麼勝算機會，目前只希望法官能網開一面，減輕判刑，他會寫求情信。他指王青霞日後重獲自由後會被遞解出境，但不成問題，兩人可在內地結婚及定居。說到這裏，李龍基再次激動起來，哽咽表示︰「我答應佢，佢出嚟，我一定會娶佢，一定同佢結婚，所以我叫佢唔好擔心，喺邊度簽字都冇所謂，不過好大程度會入國內簽字。」