林奕匡（Phil）初為人父，囝囝Darrien出世後，他感受良多，所以特別創作了新歌《搖籃下的歌》並於今日（14日）上架，但想不到預先寫好的歌詞，竟然神預言了Phil的狀況與心聲，完全說中了他初次跟囝囝見面的畫面與心情。
當初知道要做爸爸的時候，Phil已經靈感如潮湧，他回想道：「知道就嚟做爸爸嘅時候，已經有好多想法，即刻寫咗好幾首歌俾Darrien，當時一心只想用嚟記載同送俾佢，至於有冇機會製作成一首歌，我自己都唔知道。」但當決定要做歌之時，Phil考慮到自己的歌庫中，以鋼琴為主的ballad作品為數不少，但以結他創作的則比較少，所以他就想到要以結他創作一首歌送給Darrien，Phil續說：「今次就以寫首歌送俾囝囝為由，邀請咗新加坡音樂人Marcus一齊創作，佢結他有一手，過去佢都同過唔同人合作；寫《搖籃下的歌》嗰時我哋隔空合作，但好合拍，個零鐘已經寫好首歌。」
創作好旋律，交由林寶填詞後，Phil便安排了錄音日程，但人算不如天算，Darrien竟然提早出世！Phil也始料不及，「錄音schedule一早決定咗，但唔知佢幾時出世，呢個就係天嘅安排，啱啱佢出院嗰日，我就去錄音！其實好得意，情感上係滿滿，但嗰一刻其實好難錄歌，因為情感泛濫，不停唱唱吓就喊。」Phil感情如此澎湃，全因林寶的歌詞神預言了一切！Phil分享到：「我好鍾意歌詞中幾句『今晚心情 怕你亦也許難聽得懂幾句 唯願我枕邊跟你伴隨』，BB啱啱出世嗰陣，我推住BB保護箱行出手術室，當時媽媽仲喺手術室，得我同佢獨處半個鐘，當時我幫佢影咗啲相同影片，其中一條片，我有講到『知道你唔知依家發生緊乜嘢事，亦都唔會有任何記憶，但係我會幫你拍低記載一下。』呢句歌詞，就好係我嘅心聲、心情，現實生活中，我真係實現咗呢個畫面！」
《搖籃下的歌》製作完成，Phil仍歌不離口，他笑言：「我唔敢話《搖籃下的歌》係佢專屬搖籃曲，但佢應該係聽得最多，因為我成日唱俾佢聽。其實我一早寫咗英文歌詞，都可以話英文版係特別送俾佢，係我打從心底創作，當中包括我嘅期待、盼望、未知、憂心、鼓勵與陪伴各種心情；中文版就係同大家分享嘅，因為我相信每個做父母嘅都一定有呢啲感受。」
除了推出新歌，Phil亦分享了成為爸爸後的轉變，「作為新手爸爸，起初係有啲雞手鴨腳唔知點算，我咁大力、佢咁脆弱，佢成日郁身郁勢，我唔敢同佢鬥力，怕整親佢，又驚抱得佢唔舒服；依家佢硬淨咗，我又多咗經驗，兩個開始有啲默契，佢一日比一日認到多啲我，每日都會俾多少少表情，我哋嘅connection明顯愈嚟愈多，所以每日都愈嚟愈開心。」Phil表示，他已開始習慣當一位爸爸，人生好似大躍進，多了份責任，要懂得照顧人，而身邊親友，亦會叫他做「阿Phil爸爸」，為此他也開心不已。