林奕華：過來人語

明明是一子之母，卻讓人稱呼她「姑娘」，賴以糊口的營生是賣笑，她又姓白，「白姑娘」在這女人身上，像面具，使人好奇她在什麼時候，才會以真面目示人。

《輪流傳》裏多着睡衣，少見整裝（濃妝是另一回事）的她（佩雲），幾乎沒出過幾次門，唯一可以見識她對人「打開天窗說亮話」，就是在同一屋簷下如何待人接物。刻薄成性的房東何師奶（梁愛）便被她一語收拾：「以後我出多一蚊，門口嗰盞樓梯燈你唔好熄呀吓。」

至於坐在對面那未諳人事的少女，如黃師奶（李香琴）的長女影霞（鄭裕玲），白姑娘示範的則是「過來人語」。

在這一幢陋室裏，白姑娘笑得最多。不管是性格上的看得開，抑或是職業養成的慣性，她既不要自尋煩惱，也不要被別人困擾。這個角色特別在於，她沒有故事線，可是有不着痕迹的滄桑。

本來是她有求於略具英文程度的影霞寫信。「做我哋呢行呀，叫我哋講幾句鹹水英文就得嘅，你話叫我攞枝筆嚟撩雞腸喎，真係辛苦過叫我擔『枷』呀。係咁嘅，有個印尼客，對我鬼咁好，我對佢都唔錯㗎，呀，佢個人又幾好㗎，佢都唔知係咪撞邪嘅，對我就癡情到死，叫我跟佢過印尼同佢結婚喎，我有個仔都話唔嫌我添喎，真係前世喺啦。老實講呀，如果响六、 七年前，我都會聽佢話跟佢嘅，話之做妾侍又好，做填房又好呀，但係而家就唔同啦，嗱，影霞我教精你呀，啲男人鍾意你嗰陣，就當你係寶喎，但一厭咗你嗰陣，你仲賤過地底泥呀。

「尤其是我自己做呢行先講呀，唔係咁容易做返正當人家㗎。每一日唔瞓到十二三點就唔躝起身，每一晚唔到兩三點又唔躝去瞓，咁你話喇，整整吓咪又要出返嚟，咁何苦累己累人啫，你話係咪呀？」

聽了這番肺腑之言，影霞提醒白要為兒子着想。「呢層我都諗過嚟，阿煥而家咁大個仔，佢樣樣都識性㗎啦，就算個男仔對佢係好好都好啦，佢個心都係唔舒服㗎嘛，你估真係做油瓶仔好馨香㗎咩，唉，總之算喇，我咩都唔理，我咩都化曬，俾心機搵幾年錢，然後同個仔過番啲太平日子，你話將來如果佢係生性囉喎，我咪娶埋新抱預備湊孫囉，如果佢係唔長進嘅，我就唔理咁多㗎啦，我咪由佢自生自滅囉，養到佢廿幾歲仔對得佢住啦，係咪呀？必要時咪入師姑庵食長齋囉。

她們之間，還是會因為經濟條件而關係各異。何師奶會給黃師奶臉色看，給她說話聽，雖然黃師奶也是自力更生，但相比白姑娘不省那一個幾毫的做人處世，是非就是長不到她身上。

黃師奶形容影霞前一個晚上難以入寐是「作怪」，暗示她是少女懷春。其實在這房間裏長大的，都不能輕談青春。小女兒釘珠不夠快，就被警告「你要食晒佢」，大女兒失眠，原來是在考慮要不要由帶位員轉業女招待。

「哼，總之就無他嘅，世事嘅嘢，總之你要睇遠啲，睇開啲，做嘢就要對得住人哋，對得住自己，我就算數。」

坐着把這一車車自說自話聽了進去，本已心事重重的影霞更坐立難安，站起來表示怕英文不夠好寫不到白姑娘想表達的意思，白忙勸：「就寫Sorry，我唔跟得佢，你千祈唔好同我寫到長篇大論呀，唔係佢以為我吊起嚟賣，知唔知呀？」

當白問影霞「知唔知呀」，其實不知情的是她：接下來，她將被求教於「做酒家女招待好唔好？」