MIRROR成員姜濤一連4場首個個人演唱會《KEUNG TO 「WAVES」 IN MY SIGHT SOLO CONCERT 2023》，本周三(2日)於亞洲國際博覽館開鑼。
閉關一段時間的姜濤，身形清減了一點，狀態平穩，但要solo壓台仍有進步空間，不過，演唱會有不少感動位，播出姜濤去到「姜濤灣」(銅鑼灣)的片段，親身體驗姜糖在街頭舉牌，姜濤舉了20分鐘便投降，台下的姜糖整晚舉足兩小時，真係有血有汗仲有愛！
演唱會8時30分準時開騷，身穿黑色長褸、挑染銀灰色頭髮的姜濤，以演唱會主題曲《濤》揭開序幕，是他首次現場演繹，接着再唱出《作品的說話》和《Master Class》；姜濤又特別翻唱鄧麗君的《我只在乎你》送給媽媽，之後他有感而發：「過去一年，無論我個人還是團隊，都經歷很多矛盾，我希望可以像水一樣，有一萬種形態去接受所有批評及指點。」隨後唱出《風雨不改》與《亞特蘭提斯》。
「肥姜」合跳有驚喜
為配合「水」的主題，舞台用冰藍色的布幕營造海洋效果，台頂有LED燈效，台前有幅扮水的紗布，簡簡單單。
姜濤唱出《鏡中鏡》和《Dummy》時，他表示感恩可以成為歌手，可以用歌曲表達自己情緒，他說：「無論人生犯過錯又好，成功又好，都要保持謙卑，無論以後行到去邊到都好，都會記得自己係一個Dummy。」姜濤邀請ERROR的肥仔(梁業)上台跳唱《特務肥姜2.0》，肥仔舞功令人驚喜，二人同台亦有喜感，肥仔亦識搞氣氛，一手拎住姜濤抹汗的毛巾，為對方抹汗，更要求姜濤在毛巾上簽名，他說：「索多兩啖汗先，呢條毛巾一定係我賣出去嘅。」這一年來，姜濤的確收起了不少笑容，強烈建議「肥姜」多些合作，絕對可以舒緩一下。
商台為姜糖換鐵閘
演唱會又請來林海峰做嘉賓，再次演繹2021年《叱咤》頒獎禮中頒發「我最喜歡男歌手」的畫面，林海峰又在台上妙語如珠，笑談後輩提攜前輩的現象，笑言因為姜濤的關係，令自己的事業再創高峰，他說：「三年前疫情大家唔喺現場係咪好遺憾？今日再頒過好冇？」林海峰又話：「我唔係想頒俾你㗎，係頒俾台下面一班姜糖，佢哋先係用作品說話，點解？你問吓佢哋買咗幾多支牙膏、食咗幾多炸雞、買咗幾多份保險？」
林海峰稱姜濤為廣告界帶來新面貌，就連廣播道也出現新面貌，「我做《晴朗》已經最早，但我一返到去就見到姜糖坐晒喺度，早過我返工，商台為咗你哋換過晒啲鐵閘，我喺商台返咗四十年，換得最多係節目主持人，其他冇乜嘢換過，但為咗姜糖，換晒啲鐵閘！」他又大讚姜糖的毅力，「出面成班好似盧覓雪咁，個個熱暑人，但都冇一個暈低！」
面對林海峰的妙語如珠，姜濤只能傻笑，林海峰繼續說：「我有冇獎唔緊要，最重要我有冇獎頒俾你，所以你要努力，唔係你口中講的衝出亞洲、成為亞洲第一、紅過羅湖，姜B努力係為咗林公子的成就，因為我要努力頒獎俾你，作為前輩會繼續孝敬後輩，希望後輩繼續每年提攜前輩。」說罷林海峰向姜濤鞠躬，令他難以招架，之後場內播出叱咤頒獎禮音樂，林海峰重演頒發「我最喜歡男歌手」獎座頒給他，並叫姜濤要繼續努力，做真正的我最喜愛的男歌手，之後姜濤翻唱黎明的《我的親愛》。
親身體驗做姜糖
姜濤唱完張國榮的《追》之後，大會播出他在銅鑼灣街頭的片段，大談自己對姜糖的看法，畫面亦播出每年「姜濤誕」的場面；姜濤表示從工作人員得知，粉絲整天都一直舉着燈牌，直言對大家的付出難以想像，結果他親身體驗，走到去銅鑼灣街頭舉牌，並由助手計時，可是舉了近20分鐘之後，姜濤便坐在地上大叫：「好攰呀！姜濤真係乞人憎！好攰呀！」他繼續說：「諗起佢哋每一個人企喺度，入行五年，從來未試過咁想見到你哋，由呢一刻開始，大家要變成真正嘅屋企人，辛苦你哋！」接着唱出另一首新歌《好得太過份》送給姜糖；最後，姜濤唱出《蒙著嘴說愛你》為個唱作結，整晚共唱出20首歌。
