Inez上載在終點等老公過線時的片段，感動到落淚；Tony雖然不停嗌好辛苦，但仍不忘咀嘴多謝老婆的訓練。Inez留言：「更開心一定係Sir都順利完走，等佢過程已經好期待，過線嗰刻真係好滾動，見我咁情深咁望住Sir就知我開心過佢。今次隻馬雖然唔係靚時間，但係意義最大，多謝@guruhung（洪永城）陪我一齊癲，下隻馬跑咩好呀Sir？」
作為「初馬」的Tony，亦有發文留言：「除咗同攰之外，有少少感想：我終於明白點解啲人話人生就好似一個馬拉松咁，因為你會覺得跑跑吓，點解啲人跑得咁快跑前得你咁多，因為佢哋有做功課囉，做準備囉，應該比你更加優秀，但係跑多一陣你又見返佢慢咗落嚟，休息緊，你嘅耐性同堅持贏返佢一次，同埋證明天賦幾好都好，自己唔堅持都會俾人超越。同證明咗每個人嘅步伐都唔一樣，只要你夠努力一步一步，你係可以追番你之前落後嗰啲。」最後當然多謝老婆的鞭策，並Sweet爆說：「幸福有一個逼你keep going嘅人。」
楊潮凱亦留長文表達其「初馬」感受，直認在缺乏練習、出發前感冒再加上練習途中觸發右腳舊患，導致連行路都有問題，以及連續數天來回內地拍劇及舟車勞頓，完全不是比賽狀態，但他承諾一定要完成比賽。
一直保持輕鬆心情參賽的潮凱，跑到16公里時，右腳開始痛，他咬實牙關捱過去，但去到25公里，他的腳已經痛到行不到，基本上每跑兩步就要行五至十步，「去到接近28公里，其實我有諗過放棄，因為真係痛到標（飆）眼水，同埋望住個錶，好似同自己嘅Target越嚟越大大大距離，嗰個moment係最痛苦，你個心係好想去完成，但係個身體唔容許，我相信嗰段時間，係我人生講得最多粗口嘅時候，去到30公里，我不斷同自己講：『你得㗎！你一定做到㗎！痛痛下就唔痛㗎喇！』」
半跑半趷的情況下，潮凱去到最後5公里的大斜路，他腎上腺素突然飆升，奇蹟就在這刻發生。「咬實牙關衝過終點嗰一刻，我好感動，感動到想喊，感動嘅係原來有啲嘢只要你唔放棄，就一定會做得到，我為我自己沒有放棄而驕傲，我可以好大聲咁同CatherineBB及雞蛋仔講：『你爸爸係一個完成到馬拉松嘅人！』希望佢哋都會proud of me。」
