楊茜堯今天（18日）獲邀出席健康食品活動，為照顧子女加上疫情，已3、4年沒有出席公開活動，她覺得很珍貴，緊張得前一晚睡不着。問到這期間金錢上損失？楊茜堯豁達說：「唔好計呢啲！應該計得到幾多，而唔係失去幾多，覺得最緊要係平安，兩個小朋友令我得到很多開心。」不過她坦言湊仔也很累，辛苦過拍劇。
其實婚後的她只曾與老公羅子溢，以夫妻檔拍過無綫劇《家族榮耀》，她表示有傾再拍劇，如適合會再拍。對於《家族榮耀之繼承者》沒她份，她說：「係囉！點解呢？唔可以話被頂替，每套電視劇故事需求都不同，其實續集故事架構全部唔同，演員都洗晒牌。」
楊茜堯指和老公大把機會再合作，但總覺得兩公婆合作好奇怪。她說：「觀眾未必好鍾意睇，相信陳豪和陳茵媺都係一套起、兩套止，覺得美好嘅嘢要讓觀眾睇到，但唔可以多，有吸引角色當然繼續去做，和老公合作都幾開心，但可能拗撬又會多，如敵對都幾大鑊。」
早前兩公婆飛甩仔女撐枱腳慶祝結婚7周年，楊茜堯亦在社交平台分享對「七年之癢」的甜蜜對話。問楊茜堯可有七年之癢？她笑道：「我連𢯎痕都冇時間，對仔女成日都話要𢯎痕，老公就話唔痕囉！」
