郭晉安與歐倩怡（Cindy）5月初宣布離婚，結束近18年婚姻，令全城震驚。離婚後的Cindy日前就接受蝦頭及連詩雅主持的《絲打圍爐》訪問，卻罕談目前的感情狀態，更自爆正在玩交友軟件。她坦言自己對感情持開放態度：「冇所謂，有啲七老八十先遇到真愛喺埋一齊啦，我諗依家呢個世代，緣份擋唔住，要走又挽留唔到，人生就係離離合合，生老病死。」
Cindy獲主持大讚是時間管理大師，她回想最辛苦是大仔上小學細女仍在幼稚園的階段：「始終有嘢要犧牲，以前小朋友要車出車入，一日瞓4個鐘，我仲要一天八次揸車來回西貢同九龍，時間同油錢都幾大件事。」做人妻後一直相夫教子多年，Cindy未有停下腳步努力進修，考獲多個學位碩士及專業資格。除成功考獲營養師牌，更表示希望可以再考瑜伽導師牌，試試40幾歲人可否做拱橋。
而談到回復單身的轉變，Cindy大方自爆自己正在玩交友軟件，更指：「女人真係唔好讀太多書，真係有啲男士係會驚你，講個秘密畀大家知，最近開始玩交友App，profile寫自己咩咩咩，勁得濟係嚇親人，所以盡量簡單啲！不過原來鍾意運動嘅女人，係原來多啲人like。」她更透露曾與六位比較投契的男士見面，其中一人連續爽約兩次。不過Cindy稱玩App只是實驗性質，不是為認識男生而認識男生，「我16歲開始入娛樂圈，我個世界都係娛樂圈入面嘅人，近呢一年喺中醫診所打工，開始接觸呢個社會，但其實好多人際關係、社交手腕等，以前都係靠晒經理人，呢方面我係好渣。所以，其實我係想睇下呢個世界，唔同行業既人做緊乜。」她笑指交友軟件中靚仔的大多數都是「伏」，並大爆有男士出扮作不認得她，又更以為是拍整蠱節目。
她又提2019年12月患重感冒，當時發燒看了3次醫生也未退燒，全身更有觸電感覺兼呼吸困難，隨後更出現失禁情況，甚至驚現人生走馬燈，「我攞住個痰罐，最後我只飲咗少少（片糖水），我想話你知，嗰刻我已去到失禁，我已經控制唔到，搞到張床周圍都係。去到失禁一刻，我已經知自己唔得，然後好似做戲咁，開始出現人生回帶，我覺得唔得㗎，我啲仔女太細，會諗仲有啲咩未做，跟住我暈咗，成個頭塞咗入痰罐，暈咗。」其後她入院留醫，得知患肺炎、肝炎、腸炎、尿道炎等，食藥長達半年才康復。
