江欣燕最近接受雷霆881商業一台的《星光背後》，談及復出後由演主角變配角再演母親角色的心路歷程外，亦詳述了她入行後的兩段情，當中包括與張衛健的五年初戀，以及與前夫吳積遜（Jackson）由結婚到離婚鮮為人知的經過。
欣欣於1985年參加華星新秀殺入十強，一出道拍劇已是女主角，由唱歌變身演員兼扮嘢能手於八十年代創出事業高峰，雖然一度因結婚退出幕前，及至07年重投TVB拍劇，亦先後憑處境劇《同事三分親》，《十八年後的終極告白》及近日播畢的《靈戲逼人》獲得認同。
談及初戀情人張衞健（Dicky），欣欣指他是早一屆的新秀冠軍，而她同屆參賽者吳國敬，是Dicky的小學同學，比賽期間Dicky來探班因而認識及對她展開追求，「我嗰陣覺得佢好幽默！入行後佢還教我睇劇本，教我做分場。」欣欣承認與Dicky這段情一直備受父親反對，「因為當時我太細個，會認定佢教壞我，會認為如果我哋冇拍拖，新秀比賽結果會好啲，唱歌會發展好啲，點會呢？我根本冇學過唱歌，亦從沒想過做歌手。」戀情長期受壓，欣欣最後只是因為雙方工作繁忙，令她先提出分手，「我都想喺度解釋返！其實我同佢（Dicky）分手，同當時彼此嘅事業有冇起色無關係！只係想停吓，係和平分手！」
欣欣於2001年與拍拖十年的商人吳積遜（Jackson）結婚，婚後更淡出幕前變身闊太多年。她首次披露當年決定嫁予Jackson是因為奉子成婚，但結婚前夕卻經歷小產打擊，「最初是驗孕捧兩條線中咗，爹哋好開心，個個都話結婚啦，Jackson又訂到生日那天的場地。點知到五月，我忙完爸爸媽媽結婚周年嘅主持，突然一次企高拎嘢感到雙腳乏力，再搵醫生檢查之後，先發現胎兒冇生命跡象，醫生話這呢個情況，懷孕不足三個月好常見。但我係接受唔到，好失望，咁仲結唔結婚呢？但我已經約咗周刊做結婚嘅專訪。」欣欣坦言結婚表面開心，其實她本人情緒崩潰了好一陣子。
談到05年復出幕前先加盟亞視，到07年重回TVB拍劇，是否意味着當時她與Jackson的婚姻已出現問題，欣欣說：「07年我們關係仲好好，拍返嘢只是我受夠自己糜爛的生活，係到13年拍《M Club》我先離婚。」欣欣重申離婚與第三者無關，「因為同呢個人都相處咗二十年覺得悶，最大原因我中間拍返《畢打自己人》，搵返工作嗰種開心，感覺有返自己嘅世界，一個人更加開心，就不如分開。」單身十年，欣欣暫未有找新對象的打算：「我結過婚嘛，係好恐怖嘅事嚟㗎，而家不知幾咁自由，哈哈！」
