蔣祖曼（Joman）於劇集《法言人》飾演區域法院法官「翁官」（Hazel）昨晚出場，劇中她與飾演律師的張穎康發展成為「翁雄」CP，Joman透露原來與康仔早於15年前拍攝電影《圍城》已經結緣，今次再度攜手合作，Joman笑指對方變得更開朗風騷，又謂曾獲馬明問候「對住張頴康辛唔辛苦」。
Joman說：「今晚一集會有場拖手過馬路嘅重點場口，我同佢係凌晨拍嘅，劇組要慢鏡拍，所以唔可以跑得太快驚Out focus。嗰晚我著住高踭鞋跑咗好多次，隻腳跑到好痛，又要Keep住好甜蜜咁，但其實我一見到佢個樣我就想笑，但又要控制住自己嘅表情，對住佢真係好難做到好認真嘅感情戲。但我哋拍得好開心，好似聚舊咁。」
另一組值得關注的演員，則是丁子朗（丁丁）飾演的見習律師Hogan及容天佑飾演的見習師爺Tony仔。昨晚Tony仔為教訓飾演躁狂男的楊證樺，一朝「逆天」跳躍起飛腳有姿勢有實際，獲網民大讚有型有款。談到「起飛腳」秘訣，天佑說：「因為我4歲已經開始學跆拳道，由嗰時開始，我朝早起身同每晚瞓覺前都會拉筋，keep住啲筋唔好硬，所以就算有踢腿動作，都可以keep到隻腳直。」
丁丁昨晚則大獻口才及腦力，在20秒內一口氣流利地講出一大堆離婚需要填補的表格以及相關程序，丁丁事後笑指自己背對白不算最辛苦一位，並謂幸好有機會先向兩位前輩馬明及張頴康偷師：「因為係拍法庭戲先到office戲，拍法庭戲時我就係咁睇住馬明同張頴康點講對白，然後自己慢慢學同吸收，有前輩咁樣帶住都幾好。」
