今年泳兒（Vincy）展開新一章的音樂企劃，歌曲將與不同樂隊crossover，繼上首《撞到正》跟Nowhere Boys合作，飾演驅魔人後，這次輪到跟Pandora聯乘，Vincy化身女車手，以駕駛比喻人生，享受無拘無束的自由，歌曲《Ride It Out》於今日（25日）上架。
提到這次邀請Pandora合作，Vincy坦言近年一直有留意他們的作品，風格愈見鮮明，自己亦想嘗試這種groovy style。由於錄音期間，Vincy吸收了不少Pandora主音Tony的唱歌建議，因此她決定捨棄一些既定方法，再加入一些自己習慣，希望將兩者特色融為一體。Vincy表示，跟Pandora錄音十分輕鬆，因為他們是「爛gag王」，「佢哋好搞笑，我鍾意搞笑嘅人，我覺得一齊做嘢呢個vibes幾好，但要認真錄音嘅時候，大家又會好認真，對每個細節都會好執着同埋好有要求。錄音時Tony好似大家嘅大佬，我哋喺側邊傾偈吹水，佢會好認真喺電腦面前幫我哋處理音樂，跟住就會拉返我哋返嚟一齊繼續。」
不論食飯、逛街或者旅遊，Vincy都不喜歡獨自一人，唯獨駕駛例外，Vincy表示：「其實我好奇怪、好矛盾，除咗揸車我鍾意一個人，好多時候我都好鍾意同朋友一齊！對於我嚟講，揸車係一個忙碌生活裏，一個喘息空間同一個我可以掌控自己生活節奏嘅一個小天地，所以我鍾意自己揸車，有一種可以掌控自己人生，有一種好自由感覺。」她透露首次聽到歌曲demo時，腦海中已即時呈現出車的畫面及聲音，「所以我覺得Pandora喺掌握呢隻關於車嘅歌嘅感覺，做得非常之好！」
負責作曲及編監的Pandora，在編曲上亦作出新嘗試，例如加入不同的鼓聲來營造自由奔放感覺，「作品以Vincy現場表演為出發點，希望大家可以擺動身體，輕鬆咁領略歌曲帶出嘅道理，就係將駕駛沿途經過嘅風景，當做人生每件小事，美好的便盡收眼底、不快的也隨油門一瞬即逝！」
