洪永城2019年公開認戀女友梁諾妍，嚟到2021年正式宣布要拉埋天窗結婚啦！今日二人分別喺社交網宣布喜訊，同大家分享結婚感受。
洪永城：「由一齊跑步、到傾電話、睇日出、拍拖、不計劃的旅行、到扮攰逃避跑步、通宵睇動漫、同居、到我們至愛Coco離世、到開工連晚安早晨都沒有機會同你講、到今日一齊攜手踏上我倆的新旅程。好在有你，緊握我手，我希望一世都有你在身旁，追到你是我的僥倖，娶到你是我的福氣，Let’s get Married !」
梁諾妍：「下半生手拖手，繼續一起跑下去，繼續跑去世界每個角落。感恩遇到你，常常帶給我歡樂，照顧我，陪我通宵睇動漫睇網球比賽，工作上的互相扶持，願餘生我們也要一起笑住過！」
早前，Tony同Inez秘密地影咗一輯極有創意又搞笑嘅結婚照，由於兩位都係熱愛運動之人，所以結婚照都甚具動感，衣著以簡約便服為主，其中一款是他們以背心T恤、 短褲加波鞋在運動場上飛躍而起，最搞笑係洪永城以白T恤配煲呔，而另一款則是在湖邊的溫馨鬼馬相，一身背包行山LOOK，兩人雙手緊握在一起，寓意他們手拖手，今後一起笑住過！今日他們分別在社交平台上宣布喜訊，並分享結婚感受。
準新娘子Inez透露Tony求婚過程，既搞笑又感人，她笑說：「佢嘅求婚過程係好好笑，好多蝦碌嘢發生，佢喺屋企個厠所度求婚，我覺得好好笑，不過好係佢嘅 style，成個過程我係笑到喊，不過都好感動，有晚佢拍完嘢返屋企，就入咗厠所一陣出嚟，跟住到我人有三急入厠所，佢又跟住我入厠所，當我打開厠所門，原來佢喺厠所度佈置咗有一個攝錄機，又喺洗手盆度放咗啲微型燈泡，又有一束鮮花，鏡上又貼咗啲心型卡，仲寫上MARRY ME？我好笑又感動，我問佢點解要喺洗手間求婚？佢話知道我一定會去洗手間，最好笑係佢拎隻戒指出嚟求婚時候，我話我真係好急，你等一等我去完厠所先，結果佢要等我辦完大事再求婚，我就Say Yes！」當時他們開心到笑不停！
對於婚事日期，洪永城回應《明周》記者，「其實喺今年過完農曆新年後，Tony已經向Inez求咗婚，之後Tony就開始籌備他監製的電視劇，Inez就專注她健身中心搬店和拍攝節目的事。他們而家一邊忙於工作，另一邊廂籌備婚禮，婚禮會在今年內舉行，落實日子會開心share給大家。」