準馬太湯洛雯（靚湯）今天（26日）出席護膚品牌活動，以性感打扮亮相的她明顯清減不少，她坦言為在婚禮上以最靚一面示人，已勁減20磅，希望再減5磅，因為戒甜食初期心情不好，變得好燥底，未婚夫馬國明承受不少，故當知道她忟憎即去買雪糕給她吃以平衡心情。
對於馬明自爆被她訓話，不要預先披露太多婚禮詳情，靚湯強調沒有下封嘴令，受訪時呼冤：「只係佢唔知道籌備進度，所以先叫大家嚟問我。」笑問馬明有什麼知情？靚湯笑說：「佢知道自己著咩衫，之前我去試婚紗，佢問會唔會幫佢借禮服，我話婚紗店只有婚紗，佢要自己安排。（有冇擔心佢啲品味？）佢應該會搵造型師，我信造型師品味。」
靚湯表示籌辦婚事有點壓力，本身馬明也提出幫忙，但她考慮到婚期臨近，為免再重新向對方解釋，寧願自己解決問題；兄弟姊妹團名單也在處理中。她說：「婚事簡單為主，唔會百人婚禮好大陣仗，只係好小型，唔需要兄弟姊妹招呼客人，希望佢哋都可以享受其中，冇打算安排玩新郎環節，我都唔鍾意玩呢啲。」馬明忙於拍劇，外界都替她擔心婚事受阻，靚湯說：「冇影響，馬明部劇監製知道我哋已請假去歐洲影婚紗相，冇觸碰個檔期。」