影壇盛事《第41屆香港電影金像獎》將於下周日（16日）舉行，距離頒獎禮尚餘一星期，憑《窄路微塵》以及《飯戲攻心》分別入圍「最佳男主角」和「最佳男配角」的張繼聰，今日（9日）在社交網透露自己心情緊張，「真係好難平常心」。
2002年畢業於香港演藝學院戲劇學院表演系的阿聰，貼出一張17歲的舊照，並寫道：「嗰時第一次參加學校嘅舞台劇製作，唔係做演員喎，而係做舞台助理，即係打雜，乜都要做，辛苦到飛起。依個係校規，每位新生都一定要做，但係捱完之後，將來做演員你就會明，企上台，其實有幾多人幫緊你。」他直言因為當時這個體驗，令到自己直到今日，依然對身邊每一位工作人員抱住感恩的心，又感謝老師們的苦心。阿聰回憶當時做舞台助理的情景，「嗰時每晚企係台邊，望住師兄師姐落力演出令台下嘅觀眾又笑又喊又感動⋯⋯我覺得好神奇，表演者真係好偉大。由聰時開始，我就同自己講：『「幾艱難都好，我一定要做個出色嘅表演者。』」
阿聰感慨指轉眼間已過了26年，「唔肯定我做唔做到一個出色嘅表現者，不過肯定嘅係，原來真係好L艱難。瞇埋眼，諗起依26年，為咗成為一個表演者，行過嘅每一步，捱過嘅每一刻⋯⋯仲有，無數咁多次同自己講『聰，你得㗎，你仲有半滴㗎，頂埋佢』，諗番起一路以嚟嘅所有⋯⋯原來真係會控制唔到條淚腺。」他說非常感恩，到了43歲的今日仍然係一個表演者，真是愈來愈幸運，所以唯有更加努力。
對於金像獎，阿聰指無法以平常心看待，「我份人都算好chill ，都真係有少少緊張，贏輸，真係唔係重點，重點係佢硬係未到，梗係唔知點咁。不過咁，可以去到呢一步，都算係咁啦。一於嘆盡佢！唔係咩吖？」他最後又對相中對將來充滿幻想的17歲純情少年說一句：「我冇辜負你嘅演員夢，會繼續劈落去！」
岑珈其、阿Sa蔡卓妍及嚴崇天圈中人留言為張繼聰打氣，龔嘉欣亦留長文大讚：「有幸同你合作過，你不斷投放去諗每一場戲點樣再好啲，幫助對手一齊去完成，嗰份演員嘅用心投入真係唔係個個都做到呢個程度，欣賞你。」胡卓希留言稱：「每次望你表演，都覺得呢個人識發光，好神奇，從你身上都睇到出色嘅表演者，原來係咁！繼續劈落去！聰哥」朱薰則突破盲點說：「你係一個岀色嘅表演者，Btw唔好用個仔張相嚟呃神騙鬼！」麻利亦留言：「咩料！張相明明係你個仔嚟嘅！ 」Edan呂爵安則搞笑寫道：「Wow我啱啱出世。」