幸福靚太溫碧霞（Irene）將於下周二（30日）正日生日，老公何祖光（Kenny）專程請來Irene的多年好友和同事出席生日派對為愛妻提早慶生，囝囝何國倫（Xavier）亦專程由美國返港為靚媽慶祝生日，Irene當日身穿白色吊帶連身裙，酥胸半露，十分性感。
心情大靚的Irene在派對上滿場飛，除了與嘉賓們合照，又與老公甜蜜錫錫。Irene說：「因為我好耐冇喺香港，今次喺party上一次過見返好多年冇見嘅好朋友，好開心。」Irene又指今次派對全程由老公操刀，「佢送咗紮花俾我，因為我正日係30號，未知佢送咩禮物俾我。」提到生日願望，Irene表示：「最緊要心想事成，希望自己工作室繼續拍多啲好戲，新片《謊島美人魚》有好口碑同大賣，樣樣順意、身體健康，大家都開開心心。」
生日派對後，Irene已與摯愛的老公和囝囝飛到峇里島，準備過一個火辣辣的生日。即將迎58歲的Irene，靚樣與身材一直保持不變，今日她在社交網曬出橙黃色比堅尼照，大騷美好身段，並留言：「又係時間給自己放鬆一下，最愛我的人間天堂Bali，陽光女郎又來了」！曬靚靚Body外，Irene還拍攝了在其角度下，老公與囝囝在沙灘打波的溫馨親子照。
