炎明熹（Gigi）一連三場演唱會昨晚（14日）尾場，亦是去年十月因颱風關係，而取消的補場場次。昨晚Gigi獲陳煒與丈夫陳國強、姜皓文、陳山聰與囝囝陳霆軒、李幸倪到場支持。來到第三場，Gigi依然狀態大勇，又唱又跳表現落力，不過這晚的後空翻動作發生了一個小插曲，正當Gigi完成空翻動作落地時，可能用力太猛，最終Gigi被衛衣的帽「兜頭笠」，完全遮擋了視線，只見Gigi先露出可愛又尷尬的笑容，之後秒速整理衣服繼續又跳又唱，緩解了這個蝦碌場面。
擔任Gigi音樂隊成員的林智樂（Felix），來到尾場按捺不住，要在台上公開力讚Gigi，除了唱功了得，抗壓能力亦很強悍：「雖然有好多人讚佢，但有時都有啲好尖銳留言，但佢都冇嘢，更重要係由我啱啱識佢到依家，佢個初心都冇變，對每個人都好好。有時記者朋友問我，會唔會羨慕Gigi事業，我覺得唔係羨唔羨慕，而係佢真係好值得擁有！」身旁Gigi即感動表示，很少聽對方如此認真說話，並感謝對方為自己唱足三晚。
接着，Gigi獻唱《星語心願》，唱到最後那句「讓你知道我愛你」，台下即熱情回應「我都好愛你呀」。她表示小時候看電影《星願》，已經很喜歡電影的男主角，Gigi隨後唱出《對面的女孩看過來》，任賢齊（小齊）此時突然現身合唱，讓樂迷大為驚喜，更全場大合唱為演唱會掀起高潮。唱畢，Gigi說：「俾啲掌聲任前輩。」小齊謙虛感謝Gigi給他機會做嘉賓：「因為我成間公司所有同事都好鍾意Gigi。噚日我喺新加坡做完演唱會返嚟，我啲夥計全部唔見晒，個個都嚟睇你，仲要一張飛都冇留俾我！同事們，聽住，聽日返工唔使咁早，好好享受今晚Gigi嘅演唱會。」小齊又笑謂Gigi與自己的女兒同一年出世，小齊搞笑說：「人多嘅時候叫我小齊哥，唔好叫Uncle呀！」
之後，Gigi送上繡有小齊名字的水樽：「我知你5月份開巡迴演唱會，所以我揀咗呢個，識自己煲水嘅水樽，呢個可以直接煲水，非常方便，我都繡咗你個名喺度。」小齊自嘲年輕的時候仍會飲凍飲：「漸漸就用咗暖水壺啦，好多謝你。我真係成間公司都講，佢係未來嘅天后，希望大家都俾多啲機會Gigi。」最後小齊再為樂迷送上《我是一隻魚》，全場跟着和唱。
這晚的驚喜，是Gigi收到fans訴求後，特意送上新歌《還有一艘救生艙》給歌迷，但卻一時感觸唱到喊，幾乎大半首歌要台下歌迷代唱。Gigi說：「我覺得我又代入咗首歌裏面，但唔係愛情，今日最後一場演唱會，即係今日係最後一次，然後大家要遠離我嘅感覺。點解今晚先揀呢首歌嚟唱？因為我想送呢首歌俾補場嘅大家，但我真係冇用，成首都唱唔到，要大家幫我，我下次會唱好佢㗎！」台下再次大叫「加油」，為哭成淚人的Gigi打氣。
Encore部分，Gigi特別為尾場樂迷獻唱《你是你本身的傳奇》，她坦言台下每位歌迷都是一個傳奇，一起成就了她的歌手夢，Gigi再一次落淚，對於這個人生第一個演唱會舞台、還有台下的觀眾，充滿不捨之情；唱到最後一首歌《Only For Me》，Gigi叫大家高舉手機燈和唱，望向這遍燈海，Gigi淚水再一次滑落，演唱會就在淚水與不捨之情下，感動落幕。
