陳志雲七月二十日至二十二日，將在理大大學賽馬會綜藝館，舉行兩場《登陸舞台演嘢會》，「我唔係搞演唱會，又唔係搞演講會，諗咗好耐唔知叫什麼名字，最後決定叫『演嘢會』，總之內容包羅萬有，好多正能量，又有好多嘉賓，包括曾俊華、陶傑、田北俊、謝安琪、張繼聰，數都數唔晒，節目以『登陸和尋夢』做主題，各種各樣的表演都有，總之唔會令大家失望，你看我今天『雷霆傘兵』的造型，就知道我為理想已經豁出去衝！衝！衝！」
志雲大師真係冇講錯，因為綠色傘兵服全膠製作，全身包膠下，在冷氣十足的酒店宴會廳，都好快大汗疊細汗，頸後的綠色油彩都被汗水沖甩，平時貪靚的他，早前去冰島旅行，單是化妝品都買了過萬元，今次厚妝搞到皮膚敏感，商台為他在酒房訂了一間套房，活動後即刻上房沖涼落妝，「今次真係好大犧牲，我本身皮薄好容易敏感，上次影海報已經搞到皮膚差晒，所以做完招待會要即刻落妝。」
今次打正旗號「登陸」，他不擔心被人話「老餅」，笑言年齡從來不是秘密，「其實維基百科寫我的年齡是錯的，寫少了一歲，不過我冇更正將錯就錯，每個人在不同的年齡層都有不同的目標，當年邵逸夫六十歲開始創辦無綫電視，我會向六叔學習。」他指現在「銀髮族」增加，他們才是市場最強消費力的一羣，很多保健產品、健康產品的目標都是「銀髮族」，打正旗號告訴所有人他已經「登六」，可能會有好多產品找他做代言，希望可以為自己開拓更多市場。