熊貓龍鳳胎在八月十五日出世，這個月，家姐同細佬嘅一舉一動，可愛得意嘅萌相，媽媽盈盈照顧BB嘅日常，都在海洋公園嘅社交專頁公開，吸引咗大批粉絲追蹤。
眨吓眼，今個周六九月十四日，龍鳳胎BB就滿月了，海洋公園嘅社交專頁嘅網編就好開心公布：
「咁多位契爺契媽千呼百喚嘅薑醋出現啦！😍
之前同大家講過9月14日就係BB滿月嘅大日子！咁開心嘅事，海洋公園緊係想同大家一齊慶祝啦！公園會喺滿月前夕，即係9月13日中午12點舉行「大熊貓BB滿月有獎活動」，最快成功參與嘅815個參加者，將會獲得鴻福堂自家豬腳薑醋禮卡乙張。禮卡仲會印上萌度爆標嘅家姐同細佬🐼🐼 極具紀念價值！」參加方法可留意香港熊貓專頁官方Instagram (@pandahk_official)。
昨晚(10日)，專頁仲分享咗家姐細佬嘅新相同片段，BB身上的白毛已愈來愈多，黑色背心仔愈來愈黑，腳仔又愈來愈有力，家姐仲爬咗幾步，而媽咪盈盈就同照顧員輪流湊仔，盈盈瞓覺時仲好溫馨攬住家姐齊齊瞓，好鬼得意！