朱茵與譚玉瑛（阿譚）均為昔日兒童節目《閃電傳真機》主持，昨日（7日）朱茵受訪阿譚的電台節目，二人甫見面即熱情打招呼，阿譚更透露：「自從佢生咗囡囡之後就冇再見過佢。」
朱茵是90年代女神，當年她一邊修讀演藝學院，一邊返無綫拍攝兒童節目，她指當年半工讀是她人生一段最辛苦的日子，「因為兩邊走，學校有習作，又要返無綫拍兒童節目，同學之間好難明我點解要拍戲，但我逢一至五返學，周六日先拍到節目。」阿譚大爆當時同事都有微言：「對我哋呢啲返工嘅人來講，你點解咁有優待，唔使返外景。」
問朱茵當時為何會拍兒童節目？她笑言也不知道，「嗰時無綫、亞視都入過學校揀啲啱佢哋節目的人，我係被揀選其中一個，但我只能夠拍兒童節目，仲記得我張合約係King Sir（鍾景輝）幫我簽，拍到後尾半年就快畢業，我就同無綫講我要返去畢業，因為我要攞到張畢業證書。」身旁的阿譚又爆朱茵當年拍節目會追問她收工時間，「佢都好抓緊時間，成日盤算幾時收工，但我又計得好準。」女神追問收工時間全因要同時照顧學業，被讚勤奮。
阿譚形容朱茵說話清晰不會轉彎抹角，朱茵則稱讚阿譚是元老級兒童節目主持，並跟阿譚說：「由我細個睇你，到我入行同你一齊做節目，喺你身邊學到好多嘢，你係靈魂人物，講嘅嘢就係。」
