向氏家族多年來與娛樂圈有着密切關係，第二代的向華強及向華勝，更見證香港電影業的黃金年代。
近年向氏第三代開始現身人前，他們約三、四十出頭，正值盛年，包括正於內地幕前發展的向華強長子向佐、從事製作電影向華光的兩位兒子向展邦和向展威，還有因參加《中年好聲音2》被揭父親是向華榮的向展鵬。而最為低調的向家長子向華炎，其兒子向展傑並沒有選擇投身娛樂圈發展，最近自資設立一個珠寶品牌，首次接受傳媒訪問，亦罕有曝光父親近年狀況。
向前13名子女中，其中9名兒子的名字分別華炎、華榮、華光、華波、華坤、華強、華國、華勝和華民。第三代的兒孫滿地，當中包括向展偉、向展傑、向展棠、向展橒、向展熙、向展平（向佐）、向展凡（向佑）、向展飛、向展鴻、向展斌、向展邦、向展威、向展錡（已改名為陳冠錡）、向展輝、向展鵬、向詠怡、向詠茵、向詠恆和向詠彤。
首次面對傳媒訪問的向展傑（Edfeel），畢業於香港大學修讀經濟金融，外界對於向氏家族都有一個錯覺，認為大家仍然與娛樂圈事業掛鈎，Edfeel解釋︰「我喺香港讀書、姊姊就喺英國讀書，其實咁多年，父親（向華炎）都俾子女好大自由度，的確好多人會覺得，姓向呢個屋企背景，係唔係屋企人已經鋪好晒路？所謂family business，定係會有個規限，可以做乜、唔可以做乜？其實我想講，完全唔係！」
向華炎長兄為父
Edfeel說父親多年來的確十分低調，不過那個年代，長兄為父，向前離世後，向華炎一直在家中擔任父親的角色，「例如向華強在家中排第十，講緊同我父親年紀都有差距，但作為一個長子，父親會照顧晒所有兄弟姊妹，父親咁多年來都過得很低調，好少喺幕前出現，報紙雜誌應該都搵唔到佢，其實佢好博學，好照顧家庭，我覺得佢係一個非常好嘅父親。我細個好鍾意任賢齊，每次佢開演唱會，父親總有方法帶我去後台合照。」問到父親近況，Edfeel說︰「他退咗休都一段時間，有時都會做吓運動，身體好健康，每個星期都會一齊飲茶食飯。」
楊諾思是事業伯樂
Edfeel是向華炎的幼子，不過由大學選科開始，父親已對他很信任，「中學揀科甚至大學揀科，父親從來沒有干涉，他只會話你覺得邊一樣最適合就去啦，並唔係放手唔理喎，佢只係要你決定之後，要自己承擔個負責，當中遇到甚麼疑問困難，佢會教我點處理，始終佢有一個豐富人生經歷。我第一份工係上網自己搵嘅，喺city’super做trainee，做過收銀員和customer service，家人覺得係一個成長鍛煉，開始發覺自己對生活品味和奢侈品行業有興趣，跟住加入了LVMH和Gucci等牌子，而轉捩點相信是任職英皇鐘錶珠寶的時候認識了楊諾思小姐（楊受成長女），她可以說是我的伯樂，令我確認喜愛珠寶並決心開創自己的珠寶事業，當我離開英皇鐘錶珠寶之後，便去考寶石鑑證師。」Edfeel今年正式成立個人珠寶品牌「LEEF Jewellery」，他說︰「考完寶石鑑證師之後，我亦不是立即創業，我去了一個好長嘅旅行，當時疫情剛剛解禁，其中一站去了亞姆斯特丹，行行吓街無意中睇到張postcard，上面有一句荷蘭文『Leef Je Leven』意思是『Live Your Life』，就開始想籌備自己一個珠寶品牌，投資了七位數。」雖然未有實體店，但最近在香港瑰麗酒店舉行了一場高級珠寶鑑賞會，令Edfeel打下一支強心針，「成績非常之滿意，嚟緊7月就會再推出一個黑鑽系列，算係今年的重頭戲。」Edfeel的客戶除了城中闊太外，《周遊東京》的周奕瑋都是fans之一。
母親與向太同聲同氣
對於珠寶，向太陳嵐可以說是Edfeel的啟蒙老師，「我稱她為十嬸，她和媽咪對我很大影響，因為由細到大的家庭聚會，都見到她們戴住好靚的珠寶首飾，當時就開始會問乜嘢係藍寶？開始有好奇心的階段。」
向太與Edfeel母親都是台灣人，同聲同氣，兩家人自然比較相熟，「堂哥堂弟即係向佐和向佑，一個大我兩年、一個細我兩年，因為年紀相約，又一齊就讀喇沙小學，小時候相對比較密切，我記得佢哋有帶我去過《烈火戰車》嘅首映，兩位叔叔向華強、向華勝合辦的中國星，當時仲係永盛年代，開拍好多電影《賭神》、《賭俠》、《逃學威龍》等等，後尾轉型變成大家所認識的中國星，近幾年產量減少咗，轉移發展其他不同嘅產業，有酒店、地產、金融等等，我都算經歷過九十年代港產片最豐盛嗰個年代。」
同是第三代，向華榮的兒子向展鵬，早前亦參加《中年好聲音2》，Edfeel說︰「佢係我堂哥，我都有留意呀，我都聽得出佢對唱歌好有熱誠。而向佐近年喺內地發展演藝事業，覺得他很努力，近年各有各忙反而在活動上可以見到面，不過家族入面，我有唔少堂兄弟姊妹好多都從事唔同行業，律師牙醫都有。」問Edfeel有沒有想過入行？他說︰「屋企本身同娛樂圈演藝界比較密切，係有嘅，不過係17、18歲，覺得唱歌又好演戲又好，都有興趣喎，加上由細到大你見慣明星，當時父親沒有阻止我嘅，不過就開咗一個條件，點都要大學畢咗業先，咁之後長大了，大學又讀經濟金融，對從商嘅興趣就愈來愈大。」
場地︰Porterhouse
