潮流興真人騷節目，由多位重量級嘉賓打造的《超齡打工假期》，糅合真人騷與旅遊節目於一體，嘉賓到世界各地打工體驗「Working Holiday」，將鮮為人知的「蝦碌」一面呈現幕前，而向來喜歡牙骹戰的譚詠麟與陳百祥聯同彭健新，由香港鬥到澳洲昆士蘭，每打一份工後，由老闆選「傑出員工」，結果叻哥以大比數勝出，平時牙擦擦的叻哥，真是牙擦得有道理！
周一（十日）首播的無綫台慶綜藝節目《超齡打工假期》，以年輕一輩盛行的「Working Holiday」為題，更邀請嘟姐、王菀之、許紹雄、梁烈維、譚校長、叻哥與彭健新等暫時放下藝人的光環，分別到韓國、德國、悉尼、昆士蘭，邊打工邊遊歷，嘗試做酒店房務員、超級市場理貨員、葡萄園採摘員、動物園管理員、魚市場雜工、侍應、廚師、三輪車伕等；據監製周子妮Joan透露，節目概念是希望帶給觀眾一個信息，「現時流行的Working Holiday，規限在三十歲前完成，雖然做任何事情都會有期限，但想透過節目同觀眾講超齡又如何？只要放膽去試，一定沒問題。」
叻哥周身刀
節目名為「超齡」，嘉賓當然以人生閱歷豐富的藝人為主，其中壓軸上陣到澳洲昆士蘭的譚校長、叻哥與彭健新，雖然三人合共將近二百歲，但心態比年青一輩更有活力，愛玩愛挑戰，Joan表示他們在澳洲嘗試多份職業，包括到黃金海岸中餐館分別擔任「候鑊」、侍應、茶水工作，又到酒店做housekeeping、到動物園做zoo keeper、主題公園的攝影師、街頭按摩及三輪車伕等，「叻哥、校長同健仔還私下比賽，每打完一份工，就問老闆：『邊個做得最好？』」三人由香港鬥到去澳洲，究竟賽果如何？Joan指：「主題公園攝影老闆讚叻哥夠落力，而且又讚他懂得叫遊客擺甫士，好多遊客影完相之後都有購買；另外，在中餐餐館，校長做候鑊、叻哥做侍應、健仔做茶水，三個之中，餐館老闆都是讚叻哥，說叻哥可以成功推介客人叫貴價餸，讚他是個好好的推銷員，好多老闆讚叻哥，抵他平時可以咁牙擦！」
叻哥脫穎而出成為「傑出員工」，問到他在澳洲最難忘哪一份工？叻哥說：「今次打了幾十份工，份份工都有不同感覺，沒有哪一份較難忘，平時我都有打工，打TVB工，不過就一年返一日工，我年輕的時候都有周遊列國打工，去過中東、德國做製衣，沒有人知我識得裁衫、打鈕門！」
校長難忘做車伕
雖然譚校長敗給叻哥，但Joan對他亦有讚冇彈，「校長覺得做街頭按摩最得意，他指自己骨齡最長，平時他最喜歡揼骨，所以多數是他俾人按摩，好少去同人按摩，起初他還擔心在街頭擺檔按摩會沒人客，想不到非常墟冚，三人之中校長最多人幫襯，因為他自己設計招牌，寫上中英對照的『正宗按摩』，其實很多當地華人都認得校長，按完摩要求影相外，就算不認識校長的外國人都肯坐低按摩一齊玩，校長好專業，就連腳底按摩都做埋；講玩，校長亦很大膽，其中一個鏡頭，他們去玩游繩，都有十層樓的高度，三人中只有校長完成，健仔未跳已經嚇到面青、叻哥就話自己掛住笑沒有跳，最意想不到校長身手很好，兩三下手腳就完成，他指以前跟成龍拍戲試過游繩。」
校長就指，今次節目最難忘是當三輪車伕，他說：「架車本身已經好重，我見阿叻同健仔都是載一個人，但就一家人坐我架車，辛苦到呀。其實每份工都有它的難處，每份工都可以令自己學到好多嘢，可能到酒店做housekeeping學到最多嘢，執房原來都要好有層次。」正如譚校長所說，每個行業都有艱難之處，不過職業無分貴賤，只要用心去做，一份普通的工作亦有不同的體驗與領悟。●