入行十四年，陳蕾終於首奪「叱咤女歌手」金獎和「我最喜愛的女歌手」，成為今年叱咤大贏家。
從廣州來港打拚，陳蕾並不是一帆風順，要她給自己三個Hashtag，她選擇了「隨緣」、「手作」和「電競」；隨緣很重要，對獎項、對事業，甚至對一張香港身份證，陳蕾都不強求，至今她仍要每三個月續領一次工作證，她說︰「多咗人認識，申請上都容易咗，如果你問獎項對我嘅影響，呢個就係一個實際嘅影響，幫到我容易留喺度(香港)。」
今年是陳蕾的收成期，三月終於踏上紅館舞台，本周開賣首日已爆滿，為什麼大家都喜愛陳蕾？
像打機的主角一樣，陳蕾很知道的擅長技能，不會夾硬嚟，一眾樂迷亦期待她的首個紅館騷點玩法？「唔會跳舞、唔會有dancer。」是的，「入坑」陳蕾的人，大多都是聽過她唱現場，唱《熒光》時的震撼、唱《凡星》時的感動，甚至翻唱Dear Jane的《到底發生過什麼事》都好正。
「我每次唱《熒光》，台下都會吶喊『熒光、熒光』，我每次都會俾這股力量打動，唱Live嗰份力量係唔同，Live冇得捉瑕疵，係睇狀態，如果成件事個狀態係正，嗌到破音都係一個情緒展現，我亦都唔會追求每一次Live都一樣。」
陳蕾直言，紅館從來都不是她的目標，不是懶巴閉，聽落會鼻酸酸，「紅館對我的意義，是容納人數比較多，點講好呢，入咗行十幾年，在早期的時候，我覺得我能夠用音樂維生都已經好好，又點會諗到企喺紅館開騷呢？特別是初期，生活都唔容易，因為家裏得我一個工作，當時妹妹仲讀緊書，雖然屋企人唔會問我攞家用，但我都唔可以問佢哋攞錢，所以更加唔可以停下來，出糧我唔會洗晒啲錢㗎，我唔係月光族，會儲下錢，如果有乜事都要有個錢傍身。」曾經，陳蕾的月入只有4位數字，難怪她說食碗30蚊的狗仔粉都很掙扎。
陳蕾從廣州隻身來港追尋唱歌夢，2009年參加了第一屆《亞洲星光大道》出道，起初星途並不順，經歷過不少辛酸，曾經要搬到鄧小巧家合租，解決居住問題，因為她不是香港永久居民，就連前兩年向全港市民派發的消費劵，陳蕾都沒有領取的資格，陳蕾解釋︰「因為申請期間斷開過，所以又要重新計，現在都隨緣囉，其實對我又沒有太大影響？起碼工作上沒有，但可能真係多咗人認識，申請(工作證)上都容易咗嘅，講真，如果你問獎項對我嘅影響，呢個就係一個實際嘅影響，幫到我容易留喺度(香港)。」
拍攝封面時，陳蕾仍未奪得「我最喜愛的女歌手」，問她「我最喜愛」的意義？她說︰「呢個獎係投票出來的，個意義係，如果我得到，我會戥我嘅樂迷開心，因為我知道他們很努力去拉票，真係四圍去派傳單，又會走入學校幫我宣傳。」對於獎項，陳蕾十分冷靜，賽前亦甚少「拉票」，她有背後原因，「有時就係咁矛盾，如果過於拉票，樂迷會覺得你好需要呢一票，然後他們會花更多時間去幫我宣傳，我唔係好想在投票上都要帶俾歌迷壓力。」結果陳蕾眾望所歸，成為樂迷心目中的「我最喜愛女歌手」；問她點睇尹光入圍「我最喜愛」？陳蕾說︰「我會覺得不同的音樂，都有大家需要類型，我覺得尹光唱《一人之境》好感動喎，係真人版唔係AI嗰個版本，佢有佢嘅故事和韻味。」
封面攝影︰Alexander Yeung
攝影協力︰Ernest Cheng、Lai Tsz Chung
花絮攝影︰洪志富
形象︰Winnie Hu
造型協力︰Miky Cheung
化妝︰Tammy
髮型︰Cliff Chan
服裝︰Balenciaga、Celine、Givenchy、Messika、De Beers