梁朝偉上周六（2日）於《第80屆威尼斯電影節》獲頒「終身成就金獅獎」，成為首名獲得此殊榮的華裔男演員。今早偉仔在黑雨下凱旋返港，並拿着金獅奬與太太劉嘉玲一同現身機場貴賓室通道，開心拿着獎項給到來接機的傳媒拍照及受訪。
偉仔直言今次跟過往得奬感受大不同，今次感受像是41年的努力。他說：「其實最感動係上到台啲人企曬起身鼓掌，突然間覺得好似係自己對自己有個交代，我成日覺得做咁多年嘅努力，做咁多嘢，一個人平時待人接物做嘢，唔係對其他人交代，係對自己有交代。突然間嗰刻覺得…嘩！呢41年，總算話係對自己有交代。」
被問到在台上為何感觸落淚？偉仔說：「就係突然間覺得咁囉，同埋佢哋全場企曬起身。其實開頭李安講嗰陣時，嗰啲嘢我喺現場我自己做嘢，無意識到我係點，經過佢講，哦原來你哋覺得我係咁，咁嗰度已經…（想喊？）我其實已經係少少。」偉仔稱當日到場的全是電影人，他們全都起身一直在鼓掌，所以感受很不一樣。至於在李安手上拿獎會否更加感動？偉仔說：「好多樣嘢加埋，我覺得唔係淨係一樣嘢。」
「得獎係大家成就咗我」
對於被讚為港爭光，偉仔重申電影不是一個人，是一個團體工作，這麼多年來由他做電視台開始，由給他機會做《430穿梭機》，受很多很好的導演啟發，有機會拍《新紮師兄》，當中杜琪峯導演啟發他很多，「唔通個獎又唔係屬於佢哋嘅咩？茶水、服裝又唔係屬於嗰個人？所以我覺得係大家成就咗我，不過我好彩行上去攞咁囉，係屬於大家，應該大家一齊分享，因為呢幾十年裏面，由1982年做到依家2023年，大家一齊合作過嘅人，一齊好努力向住一個理想進發，今日得到其實每一個人都有份。」
對李安特別提到他一個眼神已勝過一切，偉仔說：「我都話自己係唔會意識到自己係點，我點知呀，我淨係知道做咋嘛，我只係意識每次角色同演出我都做咗好多準備，當然內容會好豐富，你睇一本書同一百本書好唔同，唔係眼神，係你成個人嘅信心都唔同。即係等於嗰陣我拍《一代宗師》，如果唔係練咗咁多年，你都冇嗰個信心，你冇呢種眼神，你係經過時間同訓練先有個信心。」
至於金獅獎是否他的目標？偉仔表示跟威尼斯電影節關係從1989年開始：「嗰年係侯孝賢導演嘅《悲情城市》第一次攞，我嗰年冇去到，因為我有啲事去唔到，跟住去係同陳英雄（《三輪車伕》導演）一齊攞，最後一次係同李安（《色，戒》）去攞，嗰次因為好趕，未等到佢頒獎，我同李安、湯唯就去咗多倫多國際電影節做宣傳，後尾聽到攞獎，李安就返去攞獎，我仲記得嗰日大家一齊食晏，擺咗個奬喺度，跟住（李安）話大家嘅、大家嘅，我見到，嘩！流口水呀，如果有機會就好喇，但呢啲唔係你想就有，係好彩囉！」
「依家回復當初拍電影初心」
偉仔謂媽咪由於年紀大此行沒同行，回來後可能一家人食飯。問到會如何慶祝？偉仔指回港前已跟很多人慶祝，很累了，香港或會跟好朋友食飯，強調不愛慶祝，不會再搞慶祝派對。
問到下個目標是否奧斯卡？偉仔直言現在拍戲想法跟以往不同，他覺得現在已回復當初拍電影的初心，以前會思考如何突破，現在會盡量去享受跟整個團隊一起的旅程，或這期間怎樣去準備角色，同一班人盡自己最大的能力做到最好，才是最好玩的地方。正如他將於明年3月到德國拍攝的歐洲片，不用特別故意去想如何突破，只要做好前面的事，出來的效果就自然會好，但不是為獎項，是影片出來的質素，要大家一齊想去做好件事，有心就會做得好。
問到會否加片酬？偉仔喃喃地沒答，問是否要問「經理人」劉嘉玲？偉仔說：「其實主要睇係咪好鍾意，呢個階段我覺得開心最重要，拍一套戲同一班人開心緊要過你俾好多錢我。」至於在領獎台上公開多謝老婆，偉仔認真謂：「佢咁多年一直默默支持同鼓勵我，我覺得我從來都冇多謝過佢，所以都應該趁呢個終身成就獎講一講。（放手俾你做你鍾意嘅事？）都係，因為最後都係我決定，套戲係我去拍，唔係佢，到最後我認為好鍾意，即係點解我會接部歐洲戲，第一亞洲電影拍過好多、荷李活電影又拍過，歐洲未拍過，咁啱有個導演為我寫咗個角色，我睇完佢嘅作品都屬於係一個好優秀嘅導演，我同佢做咗幾次Zoom，感覺到佢係一個可以信任嘅人，佢係好有修養但謙虛，等於我上次接《尚氣》，都係因為同個導演做Zoom感覺到呢個人好真誠同可靠，今次都係覺得咁，試吓做唔同嘢。」
「NewJeans先係我Fans」
新片將演腦神經科學家，偉仔表示由於角色學術性較強，他兩個月前已在香港的大學找腦神經專家做研究和要看很多書本，「因為講德國請我講學，所以基本知識要有；因為要講課，所以我今次計劃用8個月去準備，我一日睇4至6個鐘頭書，我又唔係專業嘅人，所以睇得慢，睇唔明，好多謝香港幾間大學嘅腦神經科學家同腦科專家咁支持我，好多時話『如果你睇唔明話俾我哋聽，我再解釋』。」
偉仔因沒直航回來去了英國轉機，剛好有共同朋友請食飯慶祝，因而見到黃偉文。問到甚麼時候會再唱歌？他笑說：「鬼有人聽咩！」提到早前亮相韓國女團NewJeans歌曲《Cool With You》MV，偉仔稱NewJeans唱片公司的老闆剛好認識他一個認識多年的朋友，所以通過他的朋友找他：「我識呢個朋友好多年，1997年係我翻譯，我去韓國做宣傳都係佢幫我做翻譯，因為我唔知佢想拍咩，所以叫佢send故仔俾我睇同send歌俾我聽，我話如果你可以滿足我三個條件就拍：第一，我喺邊你就喺邊度拍；第二，我個造型你唔可以管，因為係我創作角色，當然有我自己諗法；第三就係我只係得兩個鐘，因為基本上佢成個MV喺西班牙拍咗，嗰時我喺東京，佢哋就飛咗去東京用綠布景拍，因為我得幾十秒。（有冇做咗NewJeans fans？）好似佢哋係我嘅fans！」
