王嘉儀（Sophy）由當年參加《超級巨聲》的17歲傻妹，變成現在31歲的「水性揚花」女人，加盟Juno麥浚龍公司炮製了兩年的新碟，終於推出，直接就叫《水性揚花》，「我改咗做剔手邊個揚字，我想變做一個有力量詞彙。」
當年傻妹脫變，一步一步走過來，王嘉儀說：「我覺得我條路，就係有一種迂迴得嚟，入面好似又有一種blessing！」紀錄時代的聲音，王嘉儀說，人生苦短，做咗先講！
王嘉儀說，希望用音樂紀錄自己與一個時代，「我想做《水性揚花》，自己想涉獵嘅音樂有好多，所以我話自己係一個『水性楊花』女歌手，水都係一個意象，有時要go with the flow，因為好多嘢，我哋已經捉唔實，何為一個女人？我到依家都仲摸索緊，『水性楊花』呢個字，我改咗做剔手邊個揚字，我想redefine佢由一個negative，變做一個有力量詞彙。」
兩年前加盟Juno麥浚龍公司「幻國文化」，王嘉儀說慶幸老闆給予自己自由度，「其實我入『幻國』之前，住咗喺台北一段時間，我喺台北就遇到『幻國』嘅經理人，佢就帶咗入公司。其實當時，我最心動始終Juno係一個好獨當一面artist，我覺得呢一樣嘢，我好想去學習，同埋我可以出到大碟，呢個年代其實好難得。」
隻身到台灣搵機會
曾經獨自一人到台灣闖蕩，王嘉儀隻身在異鄉住劏房，她笑說：「其實我覺得係個字眼上，大家有某一種印象，覺得住劏房好慘，其實好得意喎，台灣人會叫佢做雅房或者套房，佢哋有一個term叫做共居，只不過係你roommate，我自己好自豪，竟然可以咁傻又咁勇猛地，自己一個人去咗台灣住，其實我諗個轉捩點，係因為我喺香港做咗一啲EP，跟住好幸運地，喺台灣indie頒獎禮《金音獎》有提名，我嗰時唔知道幾咁有影響力，我去到台灣之後，先發現原來係國家級嘅獎，咁就開始咗我同台灣音樂圈嘅契機。」
歌迷認識王嘉儀，要從《超級巨聲》開始。09年只有17歲的她，參加了第一屆《超級巨聲》，也許當時年紀小，王嘉儀笑言「妹豬」一名，「我都覺得真係個傻妹，但我有一樣嘢冇變，就係嗰種傻妹性格，無論點我都仲係好享受音樂，我仲係好鍾意唱歌，同埋因為《超級巨聲》，我結識咗趙增熹，我第一個伯樂，我覺得由嗰個位開始，打開咗音樂大門，所以《超級巨聲》其實對我係個祝福。我覺得可能由細到大，我都係啲乖乖妹豬，讀書係填鴨式，跟人哋講咩、你又做咩，我覺得16、17歲嘅我，又有某種可愛，戇戇居居唔知自己做緊咩，跟住覺得TVB好勁呀，去參加個比賽，到依家都覺得幾峰迴路轉，無緣無故變咗做一個音樂製作人。」
遇上趙增熹第一位伯樂，之後到填詞人周耀輝，再到現在的老闆Juno，三位伯樂三種性格，換來三種得着，王嘉儀逐一細數，「阿熹就係一個大前輩，佢當時係做張國榮監製、做林憶蓮監製，我當時去讀大學，佢都有同我保持聯絡，我話我好鍾意唱歌，佢就話不如自己試下寫歌，我從來都唔係讀音樂，我係彈琴八級嗰啲妹豬，我鬼識寫歌咩，佢開導我，我就學咗何謂寫一首廣東歌，佢真係會每一個demo教我，訓練緊我去成為一個錄音室歌手；同耀輝合作又係另一樣嘢，我見到一個藝術大師，唔只佢嘅作品，係佢成個人嘅風骨，對應唔同嘅事情，佢都係好輕輕一抹風；跟住輪到Juno，佢好識得同外界連接，又保有自己色彩嘅藝人，佢好識得同外界去碰撞，但係仍然係Juno，佢好實淨，我喺Juno身上學到慢，冇咁急啦！」
畢業於中大法律系（PCLL）的王嘉儀，曾經想過當上大律師，誰知竟然做了歌手。「我細個志願有三個，一係歌手、二係老師、三就係律師，但係我覺得做律師可以等，我鍾意做大律師㗎，我覺得好鬼有型同埋捍衛正義，但係我覺得青春嘅時間，去做一啲creative會好啲，能量會高啲，廿幾三十歲應該做創作先。其實我爸媽都諗住我一定做律師，打咗個突，點解個女走咗去做音樂、做演藝，始終可能娛樂圈，喺大家眼中係一個染缸，不過佢哋都開始接受，我係好認真地去做。」
髮型：Toyo Ho
化妝：Sharon Leung
服裝：MAJE（Top）、SANDRO（Pants）
場地提供：Studio Meta / 朝映實景工作室
