當年傻妹脫變,一步一步走過來,王嘉儀說:「我覺得我條路,就係有一種迂迴得嚟,入面好似又有一種blessing!」紀錄時代的聲音,王嘉儀說,人生苦短,做咗先講!
今時今日可以有實體唱片推出,的確難得。王嘉儀說,這張碟紀錄了自己由少女脫變成女人的過程,今次還要做一個「水性揚花」的女人,「我記得嗰時經歷緊30歲關卡,我係一個迷思,從來都冇人話俾我聽,點樣係一個女人,我覺得呢幾年,就係不斷用自己音樂去發掘呢樣嘢,女性能量或者女性特質,呢一個年代好需要。我覺得大家都經歷咗好多唔同創傷,所謂嘅變化,好多不確定性,又有疫情,然後大家都有一種好迷惘狀態。」
王嘉儀說,希望用音樂紀錄自己與一個時代,「我想做《水性揚花》,自己想涉獵嘅音樂有好多,所以我話自己係一個『水性楊花』女歌手,水都係一個意象,有時要go with the flow,因為好多嘢,我哋已經捉唔實,何為一個女人?我到依家都仲摸索緊,『水性楊花』呢個字,我改咗做剔手邊個揚字,我想redefine佢由一個negative,變做一個有力量詞彙。」
隻身到台灣搵機會
曾經獨自一人到台灣闖蕩,王嘉儀隻身在異鄉住劏房,她笑說:「其實我覺得係個字眼上,大家有某一種印象,覺得住劏房好慘,其實好得意喎,台灣人會叫佢做雅房或者套房,佢哋有一個term叫做共居,只不過係你roommate,我自己好自豪,竟然可以咁傻又咁勇猛地,自己一個人去咗台灣住,其實我諗個轉捩點,係因為我喺香港做咗一啲EP,跟住好幸運地,喺台灣indie頒獎禮《金音獎》有提名,我嗰時唔知道幾咁有影響力,我去到台灣之後,先發現原來係國家級嘅獎,咁就開始咗我同台灣音樂圈嘅契機。」
歌迷認識王嘉儀,要從《超級巨聲》開始。09年只有17歲的她,參加了第一屆《超級巨聲》,也許當時年紀小,王嘉儀笑言「妹豬」一名,「我都覺得真係個傻妹,但我有一樣嘢冇變,就係嗰種傻妹性格,無論點我都仲係好享受音樂,我仲係好鍾意唱歌,同埋因為《超級巨聲》,我結識咗趙增熹,我第一個伯樂,我覺得由嗰個位開始,打開咗音樂大門,所以《超級巨聲》其實對我係個祝福。我覺得可能由細到大,我都係啲乖乖妹豬,讀書係填鴨式,跟人哋講咩、你又做咩,我覺得16、17歲嘅我,又有某種可愛,戇戇居居唔知自己做緊咩,跟住覺得TVB好勁呀,去參加個比賽,到依家都覺得幾峰迴路轉,無緣無故變咗做一個音樂製作人。」
畢業於中大法律系(PCLL)的王嘉儀,曾經想過當上大律師,誰知竟然做了歌手。「我細個志願有三個,一係歌手、二係老師、三就係律師,但係我覺得做律師可以等,我鍾意做大律師㗎,我覺得好鬼有型同埋捍衛正義,但係我覺得青春嘅時間,去做一啲creative會好啲,能量會高啲,廿幾三十歲應該做創作先。其實我爸媽都諗住我一定做律師,打咗個突,點解個女走咗去做音樂、做演藝,始終可能娛樂圈,喺大家眼中係一個染缸,不過佢哋都開始接受,我係好認真地去做。」
髮型:Toyo Ho
化妝:Sharon Leung
服裝:MAJE(Top)、SANDRO(Pants)
場地提供:Studio Meta / 朝映實景工作室