王梓軒與日韓設計師設計的可愛、滑稽公仔「Shitto Kun」，今日正式登陸烘焙店Bakebe，梓軒盛裝出席開幕禮，同場亦有剛成為媽媽嘅倪晨曦。梓軒話：「Shitto Kun終於有自己嘅蛋糕喇！因為Shitto Kun酸漏漏、唔抵得人嘅性格，所以我哋同樣設計咗一個酸漏漏，又可以幫我哋發洩到負面情緒嘅bombshell，扑開佢之後見到好多好精美嘅甜品，先酸後甜。仲有世界上最酸嘅馬卡龍，酸度仲可以自己調教，我試過加咗成支酸汁入去，加到佢爆汁，好好食㗎！希望Shitto Kun嘅故事可以令大家放鬆我哋嘅心情，喺困難嘅時候開心啲，同埋佢都幾得意㗎！」
全新嘅音樂競技節目《演鬥聽》，將會喺下個月開始拍攝，梓軒話：「好開心志偉哥俾咗呢個機會我哋，係由音樂人去主導嘅音樂節目，個班底好勁，嘉賓上嚟亦會好好玩，其中一個嘉賓係Eric Kwok，我哋玩勁啲，玩大亂奏啦！下星期就會先拍一個demo，月中就會正式開始，我見到個schedule都驚呀！」
