連午飯都情願在酒店房三扒兩啖，大細都以瞓晏覺為主菜，只有哎吔家姊一小時後就敲門趕走我的周公：「我夠想瞓到聽朝，我哋呢邊慢七個鐘頭，吉隆坡嗰邊晚黑九點㗎啦，你個Maria同阿ＢＢ妹，準備好晒同你哋用手機視像開心吓……我負責搵件衫俾阿素芳佢，梳番個頭化吓個妝精神啲嘛，話晒佢哋兩個女人都未正式見過面，都要四四正正……阿ＢＢ今日同廣告影咗一日相……」
「咁咪俾佢瞓先，大把日子。」
「一次過吖嘛，你個仔同新抱就斟茶，Maria就準備咗兩封大利市，隔住鏡頭都照封俾兩個先。」
「真係多事實。」
「你哋唔好講咗就冇件事，口口聲聲話契咗阿ＢＢ做契女，但乜都冇做過噃。」
「擒擒青飛咗過嚟嘛。」
「但阿師弟好人到，一早就幫手整咗兩隻杯，上面印咗一隻俾爹哋，一隻俾媽咪，輪到阿ＢＢ上契，見到敬茶俾Howard同阿Pam，幾識do呀，你唔好以為得閒得滯。」
「一鋪過，我知，大家都瞓得安樂，Maria唔使秤住個孫女嚟嫁俾我，我個仔契咗呢個ＢＢ做契女，呢個ＢＢ走唔甩，始終係我個孫。講到醒番晒啦，咁一陣佢兩個都要四正啲，冇利市，收唔收Check呀？」
「我送佛送到西，包喺我身上，我通知嗰邊，個半鐘頭後係吉時，好心剃吓鬚喇你。」PK Yee，我係易百楷，唔係易仆街，花名二撇雞，大喜日子，做老爺，一定不能剃。
等吉時的瑪莉亞，食飽晚飯沖完涼，小睡後化濃妝，為ＢＢ試完一套免費新装又一套，還是未夠鐘開鏡。於是我倆的蜜語時刻。「阿天奴叔報告我知，阿Pam個老竇轉機嗰陣，吩咐代佢送一大紮花俾我，多謝我捐血俾佢過咗身嘅老婆鄧天秋，都好滑稽呵？好似我係幫兇，玉成件好事咁，啱啱送到嚟，擺明用嘅花樽係古玩。呢種男人，真係唔知佢個心諗緊乜，難得阿Pam媽咪，後生遙遙的起心肝，情願走路去捱騾仔，一陣可惜手機見到佢，見到真人我真係會攬住錫佢一啖。」
開波在即，家姊渾身解數，有本事將酒店套房變小禮堂，但罕有將自己貶做阿四，推人埋位，遞茶杯利市，加旁白又肯避開不露面。兩個手機內的兩個親家奶奶真心鬥笠高帽，高潮落在ＢＢ身上。「呢個係咪『拷鑊粥粥』呀？」
「唔係，係『拷鑊爹哋』，飲茶茶喇……」
「咁你ＢＢ你以後叫我哋做乜嘢呀？」
「姐姐媽咪……」
「又係姐姐又係媽咪？咁咪要俾兩封利市你囉？」
「『拷鑊爹哋』，『拷鑊仔』瞓咗啦，佢啲利市你哋俾我吖……」，哄堂大笑，ＢＢ天生打天才波，應付各種大小場面。家姊推響她上個世紀登台的首本名曲「Que Sera Sera將來是個謎」， 跟八千里路以外的ＢＢ和唱起來。「When I was a little girl, I asked my mother, what will I be……」